IKhansela lifuna intsha kwezolimo
UMKHAKHA wezolimo awuyona nje indawo yokuzogugela, kodwa yisiphethu somnotho wezwe. Kuyishwa nje ukuthi intsha yethu engasebenzi ayikakakuqondi lokhu.
Lona bekungumbono weKhansela likaMasipala weDolobha uMhlathuze, ngaphansi kukaWadi 28, uMnuz. Madlinyoka Ntanzi.
UNtanzi ukhulume kanjena emcimbini wokwethulwa ngokusemthethweni komsebenzi wensimu yokulima, obizwa ngePhinduvele Community Project.
Lomcimbi bewenzelwe esigodini saseBomvini, ngaphandle kwaseNgwelezana.
LeliKhansela lithe likhathazekile ngokungabonakali kwentsha emikhakheni ebalulekile ezweni njengomkhakha wezolimo.
‘Baphi nje abantu abasha kulomsebenzi? Kungani sibone abantu abadala bodwa kwezolimo? Ezolimo yizona eziwumgogodla womnotho.’
UNtanzi ubuye wanxusa amalungu omphakathi nabalimi bendawo ukuba bayinxenxe intsha, isondele kwezolimo.
Ubuye wakhuthaza namalungu enhlangano iPhinduvele ayishumi nane, ukuba awuphathisise lomsebenzi.
‘Ngizocela lomsebenzi nazi ukuthi ungowenu, akuwona okahulumeni, ngakho ke uphatheni kahle. Njengoba kade sinibiyelela lensimu engu-2,4 hectares, asifuni ukuzwa ukuthi sekuntshontshwe ucingo nezinye izinto ezibalulekile.
‘Siyazi kodwa ukuthi kusenesidingo sokuba kulungiswe umgwaqo ongenelela kulensimu. Sizocela nomasipala usilungisele lomgwaqo ongenela lapha,’ kunxusa uNtanzi.
Lenkulumo yakhe yenanelwe nayisikhulu esiseHhovisi lokuThuthukiswa Komnotho Wendawo kumasipala uMhlathuze uMnuz. Xolani Mthethwa.
UMthethwa udonse ngendlebe amalungu alenhlangano ukuba awusebenzise kahle lomhlaba, ukuqeda indlala.
‘Uma niwusebenzisa kahle lomhlaba, ningenza inzuzo ebalelwa ku-R500 000. Uhulumeni useyivule yonke iminyango kubalimi abasafufusa. Konke sekusezandleni zenu ukuthi nikhiqize.’
Lomcimbi bewuhanjelwe nangumeluleki wezolimo, osehhovisi eliseMhlathuze, loMnyango Wezolimo Nokuthuthukiswa kwezindawo zasemakhaya uNkk. Bongi Madondo.
UNkk. Madondo naye ukhuthaze lenhlangano yabalimi ukuba isebenze ngamandla, ukuze ithumele umkhiqizo wayo esikhungweni uThungulu Fresh Produce Market.
Calls for youth involvement in agriculture