Injabulo behlomula ngomtapo wezincwadi
SEKUZOFANA nomlando kubafundi bakwesaKwaMthethwa ukugibela baye emadolobheni, uma befuna umtapo wolwazi, njengoba lendawo isinomtapo wolwazi omusha ceke.
Loluhlobo lomtapo wolwazi owakhiwe ngendlela yesimanjemanje nenobuchwepheshe, uvulwe nguNgqongqosghe Wezobuciko Namasiko kuzwelonke uMnuz. Nathi Mthethwa.
Enkulumeni yakhe uMthethwa ubongele kakhulu izikole zasemakhaya, ezikhiqiza imiphumela emihle ukunezikole asemadolobheni, yize zintula izinsizakusebenza.
‘Njengoba sivula lomtapo, nginxusa umphakathi ukuba uziphathe kahle izinto ezilethwa uhulumeni, ngoba ekugcineni kosuku kusizakala wona umphakathi,’ kuqhuba uNgqongqoshe.
Uxwayise labo okuthi uma kukhona abakhala ngakho, bese bedicilela phansi izakhiwo zikahulumeni ngokungenasidingo.
‘Sifuna nikuqonde ukuthi loluhlobo esizoninika lona, lufana neminye imitapo yolwazi engu-19 esinayo lapha esifundazweni.’
Uthe uMnyango wakhe usebenzisana kakhulu noMnyango Wezemfundo, ngoba ulwazi olusuke lutholakala luphinde lusize
ekuthuthukiseni ulwazi lwezemfundo kubafundi.
‘Sibheke ukuthi lenyuke kakhulu izinga lemiphumela, njengoba sekunomtapo wolwazi, ngoba abafundi bakwazile ukukhiqiza imiphumela emihle ingekho lendawo,’ kuchaza uMthethwa ongowakhona kulendawo.
Obebongela isizwe uMntanenkosi Mthethwa, unxuse abazali ukuba basekele othisha ekuthuthukiseni ezemfundo.
‘Siyafisa ukubona labafundi sebebuya, sebezothuthukisa isizwe uma sebefunde bagogoda.’
Lomcimbi bewuhanjewe nayiMeya kamasipala uMfolozi, uMnuz. Wonder Mgenge, naye onxuse umphakathi ukuthi ulekele othisha, ngokwenyusa izinga lemfundo, njengoba lendawo yasemakhaya, inezinga eliphezulu lokushoda kolwazi namakhono.