Kuthuthukiswe ezikaqedisizungu eMandlanzini
SEKUNGUMLANDO entsheni yaseMandlanzini ukuthi izithole iphuma kulendawo iye kwezinye ezingomakhelwane ukuze ithole indawo yobumnandi, njengoba bebengenayo indawo yezikaqedisizungu.
Lendawo eyaziwa ngeleGawozi lifestyle inezinto eziningi, eziphinde zasiza umphakathi wakulendawo, nebezikude njengendawo yokuwasha izimoto, nendawo yokugunda nalapho kunendawo yokuphumula bezitholele nendawo yokosa inyama, nokuyizinto umphakathi wakulendawo obuyibona komakhelwane.
Ongumnikazi wakulendawo uMnuz. Mandla Mpungose nobuye abe yisakhamuzi kulendawo, uchaze iphupho lakhe analo lokuthi athuthukise lendawo, ngokuthi kuvuleke amathuba emisebenzi entsheni iphinde futhi iqoqeke, ibe ndawonye ikakhulu ngezimpelasonto, izijabulisele ngasemakhaya.
Uthe okumenza abize osaziwayo asebedumile emkhakheni wezikaqedisizungu, yingoba ufisa ukuthuthukisa intsha ngamakhono kwizinto ezifana nezinkondlo, umculo nokunye.
Unxuse abazosebenzisa lendawo ukuba bayihloniphe, lokho okuzokwenza baqhubeke nezinhlelo zokwenza lendawo igcine isikhiqize osaziwayo bakusasa.
Omunye wabebehambele kulendawo uNkosikhona Mthiyane uthe, into ebibanika inkinga kwezikaqedisizungu, ukuba kude kwezindawo lapho behlangana khona.
‘Siyayidinga indawo ezosenza sikwazi ukuveza amakhono ethu njengentsha yendawo sindawonye, siphinde sishiyelana inkundla nabanye ozakwethu.
OyiKhansela lalendawo uMnuz. Praisegod Zondo ubabongile abantu abanjengoMnuz. Mpungose, abanezinhloso zokuthi kuthuthukiswe indawo ngayo yonke indlela.
Promoting entertainment in Mandlazini