Ukhala ngoxhaso Umqhathi owamankomane kuleli
UMQHATHI wesibhakela wasesiFundeni i-King Cetshwayo, uThulani ‘Dr 3 Seconds’ Nkwanyana usenxuse omasipala bendawo, kuhlanganisa noMasipala weDolobha uMhlathuze ukuba bamxhase, ukuze athathe lomdlalo awebeke kwelinye izinga.
UNkwanyana, owayengumshayisibhakela ngokwakhe, uthe isifiso sakhe esikhulu ngukuqhatha izimpi zesibhakela esifundeni, ezizohlomulisa zonke izinhlangano zabashayisibhakela ezikulendawo.
‘Baningi abashayisibhakela asebaze bagqwala, ngenxa yokungazitholi izimpi, kwazise ibhokile indlala yemiqhudelwano yesibhakela kulendawo.
‘Inhloso yami enkulu ngukuqinisekisa ukuthi bonke abashayisibhakela balapha eMhlathuze, baphelela khona lapha, bangafudukeli kwezinye izifundazwe.
‘Iningi labashayisibhakela balapha sebefudukele eThekwini naseGoli, ukuze baqhubeke nalomdlalo wabo.
‘Ukuba nemidlalo yesibhakela lapha kuzosiza nokufukula umnotho wedolobha.’
UNkwanyana utshele leliphephandaba ukuthi uhlela ukusungula umqhudelwano iBayede Champion Belt, ezobangwa ngabashayisibhakela bakulesi sifundazwe, ukuze ibacije bakwazi ukumelana nabanye abashayisibhakela bakwezinye izifundazwe. Umqhudelwano wami wokuqala wesibhakela ububanjelwe eSanlam Centre ngo-December, futhi ngihlela ukwenza lomqhudelwano minyaka yonke, ukuze ngivukuze abashayisibhakela abancane bagcine belwa esibhakeleni esikhokhelwayo.
‘Ukuthola abaxhasi kuzophinde kulekelele ekuthuthukiseni lomdlalo, kuphinde kusize ngokuqoqa intsha, iyeke ukuba wuvanzi emigwaqeni,’ kuchaza u-Dr 3 Seconds.
Omunye wabashayisibhakela abawesekayo umkhankaso kaNkwanyana nguMduduzi ‘Sgora’ Mzimela.
UMzimela ongaphansi kwesitebele sika-Dr 3Seconds, uthe kumanje iyabakhuhla indlala yokungazitholi izimpi.
‘Uma singathola abaxhasi lomdlalo ungadlondlobala
Nguye lona uMduduzi ‘Sgora’ Mzimela okhala ngendlala yesibhakela Empangeni
ngesivinini. Mina nje ngifisa ukuyomela lelizwe emidlalweni yama-Olympic Games, ngigcine ngingumpetha womhlaba,’ kuchaza uMzimela. Boxing promoter seeks financial assistance