Isikhwama sokusiza abafelokazi
UMELAPHI wendabuko uMnuz. Sibonelo Mkhulu Nxele useqhamuke nesu lokusiza abafelokazi abahlwempu kanye nemindeni ephethwe izingane eziyizintandane endaweni yaseNdlangubo, ngaphani kobukhosi bakwaMzimela.
UMnuz Nxele uthi inhloso yakhe enkulu yokuvula lesi sikhwama ukulwa nobubha okubhekene nabafelokazi bakulendawo, kanye nokusiza imindeni eholwa zintandane, eziphila ngaphansi kobubha okungabekezeleleki.
‘Emva kokubona ukuthi baningi abantu abatheleka ekhaya okungabafelokazi kanye nezingane eziyizintandane, ngibe sengibona kungaba yisu elihle ukuvula lesi sikhwama. ‘Kokunye kuyaye kuthi uma ngihambele imindeni ehlukahlukene ukuyokwelapha, ngithole ukuthi ikati lilele eziko, bese kuba nzima nokuthatha umnikelo osuke uyinkokhelo yomsebenzi engisuke ngiwenzela lowomndeni. Kulapho engifikelwe khona yilomqondo. ‘UNxele uthe okumhlupha kakhulu nokumenza angalali ukuthi, abanye abafelokazi baze bangene ebudlelwaneni bezothando, ngenxa yokwentula. ‘Lokhu basuke bekwenza ukuze bakwazi ukondla izingane zabo, kanjalo nezintandane, ikakhulukazi zamantombazana zizithola sezisebudlelwaneni nabantu abadala, ukuze zithole ukudla.
‘Lokhu kungenye yezinto ezibhebhethekisa isifo sengculazi emphakathini, nokwenza kube lukhuni ukulwisana nalesi sifo.
‘Uthola ukuthi labafelokazi babhuqwabhuqwa wusizi nje, behluleka ngisho ukuhlambulula abakhwenyana babo asebadlula emhlabeni. Yikho konke lokho okungenze ngaqhamuka naloluhlelo, lokuthi ngisungule lesi sikhwama.
‘Loluhlelo ngilubikile enkosini yesizwe sasemaNzimeleni, yalwemukela ngezandla ezimhlophe, yathembisa nokusebenzisana nami ukulwenza lube impumelelo.
‘Ngakho nginxusa noma ngubani ongaba nentshisekelo yokufaka isandla kuloluhlelo ukuthi axhumane nathi,’ kubeka uNxele.
Noma ubani ongafisa ukuxhumana noMkhulu uNxele engamthumelela kwi email : mkhulunxele@gmail.com Traditional healer on a mission to establish trust fund to help widows