Balwisane nesifo sofuba nobugebengu
AMALUNGU omphakathi waseNgwelezana namaphethelo ebambisene noMnyango Wezempilo, aphumele obala, agcwala imigwaqo, elwisana nesifo sofuba kanye nobugebengu.
Lomphakathi obushaye inhlabaluhide, ebisuka esibhedlela saseNgwelezana yayophelela ezinkundleni zemidlalo zaseBomvini, ubuholwa yiKhansela lendawo uMnuz. Madlinyoka Ntanzi.
Ekhuluma nephephandaba uNtazi uthe, inhloso yabo ngalomkhankaso ngukuqwashisa abantu ngezifo ezibulalayo, kodwa zibe zingagwemeka.
‘Esikubeke phambili njengohulumeni ngukubona abantu bephila impilo ekahle, engenazifo, futhi bavikeleke ebugebengwini obufana nokudlwengulwa kwezingane nabesifazane.
‘Loluhlelo siluqale uma kuhlangene ama WarRoom, lapho sibuka khona kakhulu leyomindeni eyentula kakhulu mayelana nezempilo, sibheke nokuthi ingasizakala kanjani.
‘Lokhu sikwenza ngokubambisana nonompilo, nokuyibona abayigqugquzelayo ukuthi ihambele nasemtholampilo ukuze ithole imithi ezoyivikela kulezo zifo.
‘Sinohlelo futhi lokuthi ngazo zonke izikhathi, singagcini ngama War-Room kuphela, kodwa siphinde futhi sihlangane nazo zonke izinhlaka, kubalwa nezikole namasonto njengezinhlaka ezihlanganisa umphakathi.
‘Mayelana nobugebengu sisebenza kahle kakhulu namaphoyisa, kuzona zonke izinhlaka, kuhlangene nawo umphakathi ekutheni silwe nobugebengu, ukuze kube nenhlalakahle nokuthula okuhambisana nokuphepha kwabantu, kanye nempahla abanayo.
‘Nasezikoleni siyalishumayela lelivangeli lobugebengu, siphinde futhi sivakashele nezindawo, lapho intsha ihlangana khona ukuyoqwashisa ngokungawuhloniphi umthetho,’ kuchaza uNtanzi.Lelikhansela lithe liyethemba ukuthi yonke imikhankaso abahlala beba nayo, izogcina ithele izithelo ezinhle, ezizohlomulisa umphakathi ngezinto ezinhle. Crime and TB awareness campaign at Ngwelezana