Zidonswe ngendlebe izintombi nto zaseMfolozi eNzalabantu
NJENGOBA sekuseduze ukuthi izimbali zesizwe okuyizintombi ezihamba umhlanga, zibhekise amabombo esigodlweni saseNyokeni, iyaqhubeka nemicimbi yokuzicijela lomkhosi, eyenziwa komasipala abehlukene.
Omunye walemicimbi ubuseNzalabantu, ngaphansi koMasipala waseMfolozi, nalapho obekubuthene khona izinkumbi zezintombi nto, zizoyalwa ngokuziphatha, nangendlela okulindeleke ziziphathe ngayo uma seziseMhlangeni.
Kulomcimbi izintombi bezizikhumbuza ngamahubo esizwe, ezifike ziwahube uma sezihlangene nezinye phambili, kuhambisana nokusina ingoma kanye nokuzilungiselela lomkhosi omkhulu.
Ekhuluma kulomcimbi obusehholo laseNzalabantu, uSomlomo womkhandlu uKhansela Zakhele Mfusi uyale izintombi ukuba ziziphathe ngendlela engezokwehlisa isithunzi sikamasipala, uma sezisekuhambeni.
Uphinde wazikhumbuza ukuthi loluhlelo lubasiza kakhulu, ngokuthi bahlomele ikusasa labo kuyona yonke imikhakha, kuhlangene nezemfundo.
Ugcine ngelokubonga kakhulu omama abahlola izintombi, ukuthi baqhube lomsebenzi abawuthunywe yiSilo, ngendlela enobuciko njengoba baye benze isiqiniseko sokuthi zonke izintombi ezikulomkhosi zikulungele ukuba yingxenye yalomcimbi.
Uphinde wakuqinisekisa ukuthi umasipala usezinhlelweni zokuthi uhlelele izintombi ezizobe ziphuma phansi kwalomasipala amabhasi ezizohamba ngawo, kuhlangene nezinye izinsiza ezizobasiza phambili.
Operation Siyaya eMhlangeni