Owephephandaba uyale abafundi base-Dover
KUBALULEKILE ukuba abafundi bakamatikuletheni benze ucwaningo olunzulu ngemikhakha yemisebenzi abafuna ukuyifundela, ukuze bengangeni kunoxhaka ozobenza bangaqasheki.
Loba bekungumbono wentatheli esimkatshubomvu kwezamaphephandaba, uMnuz. Wiseman Mthiyane, osebenzela i-Zululand Observer and Eyethu Bay Watch.
UMthiyane ukhulume kanjena ngesikhathi ekhuthaza abafundi base-Dover Combined Farm School, abenza u-Grade 11 no Grade 12, ngesonto eledlule.
Utshele labafundi ukuthi ukukhetha imikhakha yemisebenzi budedengu, kunomthelela wokwenyusa isibalo sezifundiswa ezingasebenzi.
‘Alikho iphutha uma ukhetha umkhakha womsebenzi owuzwa ngaphakathi, kodwa akukusizi lokho uma uzokhetha umkhakha vele osugcwele abantu abaningi, ngoba kukunciphisela amathuba okuqasheka kwawena.
‘Izwe lethu linengwadla yokwentuleka kwamakhono emikhakheni eminingi yemisebenzi, kodwa intsha yethu ayikushayi ndiva nje lokho. Ngiyazi ukuthi iningi lenu liyazifela ngomsebenzi wobuthishela. Kuhle lokho, kodwa kuyixazulula kanjani inkinga yokushoda konjiniyela?
‘Ngiyethemba niyazi ngohlelo lokubuyiselwa umhlaba wethu njengesizwe esimnyama. Kodwa uma siwuthola lomhlaba sizowenzani, ngoba iningi lenu lifuna ukuba ngothisha nje?
‘Yimibuzo lena okumele sihlale sizihlupha ngayo njengabafundi. Asikwazi ukulwela ukuthi kubuyiswe umhlaba wokhokho bethu, kodwa sithi sesiwuphethe singawusebenzisi.’
Kungani siqhela kangaka ezifundweni zezolimo, sikhohlwe yinhlabathi, sijahe ukugqoka othayi?
UMthiyane unxuse abafundi ukuba bavule amehlo, basabalale ngokucabanga, ngoba kuningi abangakwenza, ukunokugxila emkhakheni owodwa womsebenzi.Lenkulumo ekhuthazayo beyihlelwe nguthishanhloko wesikole uMnuz. Wonderboy Mzobe, obefuna ukuhlomisa abafundi besikole sakhe ngolwazi