Azikabhaliselwa izindlu eMhlathuze
NJENGOBA uMasipala waseMhlathuze usematasa nohlelo lomsebenzi wokuhlaliswa kwabantu, kuyawukhathaza nokho ukuzwa ngamahlebezi okuthi sekubhaliselwa izindlu.
Azikho izindlu ezibhaliswayo kulomasipala, kuhle abantu bakuqonde lokho.
Lesi yisiqiniseko esikhishwe yiMenenja yezokuHlaliswa Kwabantu kuMasipala waseMhlathuze, uMnuz. Wiseman Mthimkhulu. UBhungane ukusho lokhu emhlanganweni obusenkundleni yezemidlalo eNgwelezana, wokubuyekezwa kohlelo Lwentuthuko Edidiyelwe kunyaka ka-20192020.
Unxuse umphakathi ukuba angabalaleli abantu abahamba befafaza uhubhu lukabhejane, bethi seziyabhaliselwa izindlu, ethi lokho kuyefana nje nobugebengu.
‘Okwamanje sisematasa nohlelo lokwakhiwa kwezindlu, futhi sisagxile kakhulu kwimisebenzi yokufakwa kwengqalasizinda.
‘Uma wonke lomsebenzi sewuphothuliwe, siyobuyela kini njengabahlali, sinazise ngokusemthethweni uma sezibhaliselwa izindlu, okwamanje cha, ayikho nje into enjalo.
‘UMthimkhulu uthe umasipala wakhe umatasa nezinhlelo zokwakhiwa kwezindlu ezindaweni ezinjengaseMpangeni naseRichards Bay.
Phakathi kwazo ubalule iDumisani Makhaye Village Phase 6, yi-Aquadene Housing Project kanye neMpangeni Mega Housing Project.
Kulezi zinhlelo, iMpangeni Mega Housing yiyona enkulu kakhulu, njengoba izoba nezindlu ezibalelwa ezinkulungwaneni eziyishumi.
‘Phakathi kwazo kuzoba yizindlu zemixhaso kahulumeni, zalabo abangasebenzi, kube yizindlu zabantu abasebenzayo, kube yiziza esezilungisiwe kanye namafulethi okuqashisa.
‘Sizobuye futhi siqhubeke nomsebenzi wokwakhiwa kwezindlu ezindaweni zasemakhaya eziphethwe ngamakhosi, njengakwaMadlebe, KwaDube, KwaBhejane, kwaMkhwanazi naseBhuchanana,’ kuchaza uMthimkhulu.
Lomhlangano obuthanyelwe wumphakathi waseNgwelezana, Macekane, Mevamhlophe, Ntambanana, Dumisani Makhaye Village naseNdabayakhe bewuholwa nguSomlomo kaMasipala uKhansela Silondile Mkhize, esizwa ngamaKhansela kanye nezikhulu zikamasipala. City holds successful IDP meeting in Ngwelezana