Bakhulekele ezokuphepha abamabhasi
ABENKAMPANI yamabhasi iKhwezi behlangene nabasebenzi bonke kanye nabamele izinhlaka zabagibeli, babenomkhuleko wokubonga ukuphepha kwabagibeli babo. Kulomkhuleko babuye babonga nokuthi, kuze kufike lesi sikhathi abakaze babenayo ingozi esidlule nemiphefumulo, kuhlangene nokubambisana nomphakathi. Omunye wabaphathi balenkampani uMnuz Ephraim Cebekhulu, uthe okwenza umsebenzi wabo ube impumelelo, wukuthi babeka izimpilo zabagibeli babo phambili, okuhlanganisa nezingane zesikole.’ Izingane zesikole ziyingxenye enkulu yomsebenzi wethu ngoba ziningi izinhlobo zezingane esizithuthayo kuhlangene nezikhubazekile.’ Uphinde wakuveza ukuthi olunye uhlelo abalusebenzisayo elokuthi, babuye njalo babe nezinkundla, lapho beye bahlole khona abashayeli babo, ukuthi basakulungele yini ukuthutha umphakathi.
‘Kuyimanje sisezinhlelweni zokuthola olunye uhlobo lwamanye amabhasi amasha, bese kuthi lawo amadala siwachithe, ukuze singabi nenkinga yokuthi sibe namabhasi asenezinkinga.’
Sibuye sithuthe nabagibeli bamabanga amade, uma bewaqashela ukuhambela ezinkonzweni kanye nasemicimbini eyahlukene.
Esikufisayo ukubona zonke izakhamizi zendawo esisebenzela kuzona zenelisekile ngomsebenzi wethu, futhi nezimpilo zazo ziphephile ngazo zonke izikhathi.
‘Ugcine ngelokuthi njengoba sekusondele izikhathi zamaholide okuphela konyaka, basezinhlelweni zokuthi sithi siyafika lesosikhathi konke sekumi ngomumo ekuhambiseni abagibeli emakhaya, baphinde babalande uma sebebuya.
Bus company prays for road safety