Basabise ngokuphazamisa abafundi
AMALUNGU enhlangano yamatekisi i-Old Main Road Taxi Association, afunga ayagomela ngokuthi ngeke aze aphumule zingafeziwe izikhalazo zawo zokulungiswa komgwaqo.Lomgwaqo abakhala ngawo labo somatekisi ngu-D 1558. Bathi sekuphele iminyaka lomgwaqo unganakiwe, kanti lokhu kulimaza izimoto zabo ezihamba kuwo nsuku zonke.Babuye bavalela ekhoneni isikhulu soMnyango Wezokuthutha, bethi asizibophezele ngokubhala phansi, isivumelwano sokuqaliswa ukulungiswa kwalomgwaqo.Lombhikisho ubuvimbe umgwaqo u-P230 ophakathi kweShowe neMpangeni ngoLwesihlanu olwedlule.
Labosomatekisi abasebenza eNteneshane, Ntshidi naseNcekwane ebebedinwe begane unwabu, bawuvale thaqa lomgwaqo, kusukela ngehora lokuqala ekuseni, beshisa amathayi babuye bavimba nangamatshe.Omunye walabo somatekisi, uMnuz. Khumbulani Ngcobo, uthe sebekhathele yizethembiso zamanga ezenziwa isikhulu saloMnyango wezokuThutha.
‘Sifuna ukukubeka kucace ukuthi uma lesi sikhulu singahambisani nezimfuno zethu, nathi ke sizoqhubeka nokuvala lomgwaqo.
‘Lomgwaqo u-D1558 ohlanganisa iDlalangubo neKwaDlangezwa usesimweni esibheda kakhulu, izimoto zethu zilimala nsuku zaphuma. Sesizame konke okusemandleni ukunxenxa lesi sikhulu ukuthi ziwulungise, kodwa kuba nhlanga zemuka nomoya.’
UNgcobo uxwayise ngokuthi uma loMnyango uhluleka nokufeza izethembiso zawo, bazophazamisa nezivivinyo zabafundi bakamatikuletsheni.
Taxi operators demand road rehabilitation