Badangele kuhlehla inkomfa ye-IFP
AKUSAFIHLIWE manje ukuthi iningi lamalungu eqembu le-IFP aleneme ngesinqumo sokuhlehliswa kwengqungquthela yaleliqembu ebibhekwe ngabomvu.Lokhu kuhlaluke kwamanye amalungu akhulume nephephandaba, nangathandanga ukudalulwa, ngemuva kokuzwakala kwezindaba zokuhlehliswa kwalengqungquthela, ebizokhetha nobuholi obusha.Ukuhlehliswa kwengqungquthela kuqinisekiswe nguMkhulumeli waleliqembu kuzwelonke, uMnuz. Mkhuleko Hlengwa, othe lengqungquthela ibilindeleke ukuba ibe ngesekupheleni kwalenyanga.‘Ngingakuqinisekisa ukuhlehliswa kwengqungquthela. Lesi yisinqumo esithathwe wuMhlahlandlela weqembu, emhlanganweni obuseThekwini.‘Zonke izinhlaka zobuholi beqembu zazisiwe ngalesi sinqumo, emhlanganweni ebezibizelwe kuwo wangeSonto eledlule, nalapho ezichazelwe kabanzi ngezizathu eziholele ekuhlehlisweni kwalengqungquthela,’ kuchaza uHlengwa.Omunye wamalungu abedangele uthe, sibadumazile lesi sinqumo njengoba bese beyibheke ngamehlo abomvu lengqungquthela, njengoba bese inesikhathi eside yagcina ukuhlala.‘Uma ubheka umgqigqo weqembu nangendlela elenza ngayo komasipala uma kunezinketho zokuchibiyela, wonke lowomfutho uzokwehla manje kumalungu eqembu.‘Lenkomfa besiyilindele kakhulu, njengoba noMongameli weqembu umMntwana wakwaPhindangene ubesevumile ukuzibeka phansi izintambo, adedele abanye. Sidumele kakhulu ngalento eyenzekile,’ kuchaza leli lungu elingathandanga ukudalulwa igama.
Anger as IFP conference postponed again