Kukhulekelwe abafundi e-Dover
UPHINDE waqiniswa kakhulu umkhankaso wokuphumelela ngamalengiso kwabafundi baseDover Combined Farm School. Lomkhankaso obizwa nge#100% ugqame ngesikhathi lesi sikole sasemapulazini sinomkhuleko wokukhulekela abafundi asebezoqala ukubhala izivivinyo zabo zokuphela konyaka.Izikhulumi nezikhulumi ebezimenywe kulomkhuleko zilibeke ngembaba elokuthi, sekuyisikhathi manje sokuba lesi sikole sibuyele ezingeni eliphezulu lemiphumela, njengoba kwakuvele kuyinto yaso ukuphumelela ngezinga lika-100%.
UMfundisi Siyabonga Dube obethula intshumayelo yosuku ukhuthaze abafundi ukuba baqinise kakhulu emkhulekweni, bakhohlwe yizinto zobumnandi.
‘Njengesikole, othisha nabazali silapha ukuzoniqinisa idolo lokuthi konke kusengenzeka.
Ingcabha ikinina bafundi. Ngisho nalabo abese belahle ithemba, namhlanje ngizothi kubo, cha kusengenzeka.
‘Kulesi sikhathi ake nikhohlwe yizinkundla zokuxhumana, nibhekane nezincwadi.
Lide ibanga esenilihambile, ukuthi seningehlulwa ukubekezelela lesi sikhathi esisele sokubhala. Umkhuleko uwodwa ngeke unisize, kodwa kumele niqinise nasezincwadini ukuze niphumelele,’ kuqeqebula uDube. Akuyena yedwa uMfundisi uDube omise abafundi base-Dover isibindi, kodwa nothishanhloko wesikole uMnuz. Wonderboy Mzobe nePhini lakhe uMnuz. ZG Ngema nabanye othisha, bonke bafisele abafundi ukubhala okuhle.
Dover Combined Farm School holds a prayer for its matriculants