Bakhala ngokunganakwa abantu abakhubazekile
BAKHALA ngokusala ngaphandle labo abanokukhubazeka kokungezwa emadlebeni, bephinde futhi bengakhulumi kuyona yonke imikhakha kahulumeni.
Bakhala ngokunganakwa emikhakheni efana nezemfundo kuze kuyofika kwezithinta imisebenzi.
Lokhu bakuveze ngesikhathi kuqhubeka umcimbi obuhlelwe uMasipala waseMfolozi ngokubambisana nowase-King Cetshwayo.
Kulomcimbi bekuhlangene abaholi bendabuko, kwase kuzothi abakhubazekile bazithola nabo beyingxenye yalomcimbi, kulandela ukuthi kubuye kusetshenziswe bona.
UNksz Xolile Zwane ongomunye wabakhubazekile ukuvezile ukuthi ukukhubazeka kwabo, akusho ukuthi imiqondo yabo ayisebenzi.
‘Asikho isidingo sokushiywa kwethu ngaphandle, singanakwa uma kuhlelwa izinto zikahulumeni, ngoba siyingxenye yezakhamizi zakulelizwe.
‘Nathi sinawo amakhono esingawasebenzisa ukuba sizithuthukise, siphinde futhi siziqalele amathuba emisebenzi esingaziphilisa ngayo, nathi sigcine sesizimele.
Ngakho kusiphatha kabi ukubona uhulumeni esishiya ngaphandle,’ kuqhuba uNksz Zwane. Okunye esikucelayo ukuthi uhulumeni ngokubambisana noMnyango Wezemfundo, athuthukise izikole lapho kufunda khona izingane ezifana nathi, njengoba kwenzeka ezikoleni zabaphilayo, ukuze phela nathi sihlome ngemfundo uma sekufanele siqhubekele phambili.
‘Okusiphatha kabi ukuthi nezikole zalolohlobo olufundisa izindlela zokukhuluma kwethu, zixhaswe amabandla nawo angenayo imali eyanele ukuqhuba lomsebenzi.
Okunye size sicishe sikhunjulwe omasipala, nabo uma sibabelesele.
‘Size sifise ukwenza njengabafowethu, laba bebala elimhlophe abaze bangena emigwaqeni, nanokuba banakiwe njengoba sesibabona kuyona yonke imikhakha, futhi sebeqashwa nokuqashwa.
‘Sinxusa noma ngubani ukuba asisize, uma kukhona angakwenza nokungagcina kusisondeze kuhulumeni, sigcine sinakekile. Disabled people call for government support