Bakhumbule abadlula ngesifo sengculaza
NAKUBA kube wusuku oluvuse izilonda ezindala kulabo asebashiwa yizihlobo zabo ngenxa yesandulela ngculaza, kodwa bakhombise ukubahlonipha ngesikhathi bekhumbula lolusuku phansi kwesifunda sase-King Cetshwayo.
Lokhu kwenzeke emcimbini obuqhubeka ehholo laseNzalabantu ngaphansi koMasipala waseMfolozi ngoMgqibelo.
Lomcimbi uqale ngokuthi kube nomviliyelo osukele esikole saseMkhayideni, waze wayophelela ezinkundleni zaseNzalabantu, lapho izikhulumi ebeziholwa yilowo ongushampeni kulesifunda uNgqongqoshe Wezemidlalo uNkk.
Bongi Sithole-Moloi zishiyelane khona inkundla.Nakuba ilanga belishisa kodwa alibaqedanga amandla okuthi baqhubeke nokuviliyela ezitaladini, lapho bebedlulisela khona umyalezo emphakathini mayelana nokuziphatha.
UNkk. Sithole-Moloi ukhale kakhulu ngobaba abadala abanemikhuba yokuheha amantombazanyana asemancane, ngezinto eziwubukhazikhazi bese, kuthi ekugcineni bazicekele phansi izingane zabantu.
Uphinde waxwayisa kakhulu intsha ukuthi kufanele ijabule ibuye izithibe, njengoba sekufike isikhathi samaholide, lapho ubumnandi buchitheke zonke izindawo.
Ugcine ngelokubonga uhulumeni kazwelonke nowesifundazwe ngokuthi, aqhubeke nohlelo lokusabalalisa amaphilisi, kuhlangene nezinye izinsiza kuvikela, kulabo abangakangenwa yilesisifo.
Omunye wentsha ebiyingxenye yalomgubho uNksz. Ntombenhle Mthiyane ubonge ukuthola ulwazi abahlonyiswe ngalo.