Uyakhula umnotho waseMfolozi
IMEYA kamasiplala wesiFunda i-King Cethwayo, uNksz. Nonhle Mkhulisi uthi umasipala wakhe uzokwenza konke okusemandleni ukulwisana nokwentuleka kwemisebenzi, ukungalingani nobubha.
UMkhulisi ukusho lokhu eMangwe Village, ngesikhathi ekhuluma neqeqebana losomabhizinisi abasafufusa, emhlanganweni obuhlelwe wumasipala wakhe ngokubambisana nomasipala uMfolozi.
UMkhulisi uthe ukulwisana nalezi zingqinamba kuzodinga bafukule labosomabhizinisi ukuze bakwazi ukuthuthuka, bese belekelela ngokuvula amathuba emisebenzi.
Utshele izihambeli zalomhlangano ukuthi inhloso yabo enkulu njengomasipala, ukuqinisekisa ukuthi lesi siFunda siyasimama ngokomnotho.
‘Ucwaningo lwethu lukhombisa ukuthi umasipala waseMhlathuze okuyiwo ohamba phambili ngokusimamisa izinga lezomnotho kulesi sifunda usuqala ukuminyana ngenxa yezimboni ezingaphansi kwawo.
‘Lokhu kusho ukuthi umasipala waseMfolozi iwona ozolandela ngokuba umasipala ozoba ngowesibili ngokukhiqisa umnotho walesi siFunda.
‘Yingakho nje sithathe isinqumo sokuba nalomhlangano wokuhlomulisa osomabhizinisi abasafufusa ngolwazi, ukuze abantu balapha baqale bahlonze amathuba nemikhakha abazongena kuyo kwezamabhizinisi.
‘Sisebenzisana kakhulu neIndustrial Zone ukuthi sihlonze abatshali bezimali, ngenhloso yokulungiselela ukuhlonza izindawo esizozithuthukisa ngaphansi kwalomasipala waseMfolozi.
‘Ozomabhizinisi abaningi abasafufusa kanye nalabo abanamakhono kwezikunjiniyela yibona abazohlomula kakhulu uma sekuqala izinhlelo zokuthuthukisa lendawo,’ kubeka uNksz. Mkhulisi.
Ubuye wacacisa futhi uthi lesi sifunda sinabantu abacishe bafinyelele kwisigidi sabantu, wathi iningi lalaba bantu bazinze kakhulu ezindawedni eziseduzana namadolobha kanye abanye basendaweni yasemkhaya.
‘Umsebenzi wethu omkhulu njengomasipala wesiFunda, ukuthi sisize omasipala abangaphansi kwethi abahlanu, ukuthi bakwazi ukuhlonza inhlobo yabatshali bezimali bese sibheka nokuthi imaphi amathuba akhona angahlomulisa osomabhizinisi bendawo,’kubeka uNks Mkhulisi.
Umfolozi Municipality to become a second major economic hub