‘Ons soek werk by GO GEORGE’
Sowat 40 ongelukkige inwoners van Conville, Borcherds, Lawaaikamp en Parkdene was gisteroggend, Woensdag 13 September deel van ‘n protesaksie voor die Conville-gemeenskapsaal waartydens ‘n memorandum aan die onderburgemeester van George, Gerrit Pretorius, oorhandig is.
Die groep is ongelukkig dat hulle nie deur GO GEORGE vir werk aangestel word nie. “Ek wil ook ‘n bus driver word, dan kan ek ses ure lank lunch kry,” het ‘n luidrugte vrou tydens die protesaksie gesê.
Die gemeenskap wil hê die munisipaliteit moet die busdiens oorneem omdat hulle glo dit sal almal ‘n gelyke kans op werksgeleenthede gee.
“Die gewone mense in ons areas kry nie werk by GO GEORGE nie. Slegs familielede en vriende word daar aangestel. Ons gaan nie toelaat dat hulle in ons areas kom indien ons mense nie aangestel word nie. Ons versoek dat George-munisipaliteit hierdie projek [GO GEORGE] oorneem en dat die provinsiale regering terugstaan,” het Cornelius Esau, wat die protesaksie gereël het, aan die George Herald gesê.
Esau het die munisipaliteit sewe dae gegee vir terugvoer.
Pretorius het gesê dat hulle die memorandum in ‘n baie ernstige lig sien, maar dit eers goed sal deurlees.
“Ek is baie tevrede oor die gees waarin die oorhandiging plaasgevind het. Ons sien dit in ‘n ernstige lig en kan sien dit is defnitief ‘n groot bekommernis vir hierdie gemeenskappe.
“Ons sal daarvan werk maak om te sien waar en hoe ons hulle tegemoet kan kom,” het hy gesê.
Weens die onluste in Thembalethu kon lede van die taxivereniging nié die oorhandiging bywoon nie.