Busdiens-mosie veroorsaak opskudding
Die enorme behoefte aan bekostigbare vervoer vanaf landelike gebiede na die middedorp het ter sprake gekom tydens 'n Georgeraadsvergadering verlede Woensdag.
AIC-raadslid Abel Kiwit het 'n mosie ter tafel gelê waarin hy versoek dat die GO GEORGEbusdiens, of 'n alternatiewe busdiens, voorsien word aan inwoners van Haarlem, Avontuur, Uniondale, Herold, Waboomskraal,
Geelhoutboom,
Glentana, Wilderness, Kleinkrantz, Touwsranten en na die George-lughawe.
Die mosie is deur die DA verwerp en die ANC het buite stemming gebly. Van die kleiner partye, ACDP, Icosa, PBI,
SAC en VF Plus het die mosie ondersteun.
'n Facebook-inskrywing waarin Kiwit te velde trek oor die DA se besluit om teen die mosie te stem, het groot ongelukkigheid in die raad ontketen.
Van die DA-lede het gevoel hul lewens word bedreig deur die inskrywing.
Die mosie vra vir 'n beperkte diens in die oggende (07:00) en namiddae (17:30) gedurende die week, en 'n busrit oor naweke soggens (07:00) en smiddae 14:00. "Waar die behoefte groter is kan 'n meer gereelde diens gelewer word," lui die mosie. Kiwit versoek verder dat die diens gesubsidieer word aangesien dit langer afstande is. "Mense betaal al vanaf Herold na George R400 net om inkopies te doen. Hierdie inwoners wil ook in aanmerking kom vir werk- en opvoedkundige geleenthede wat in die middedorp aangebied word," het hy gesê.
Ofskoon die DA teen die mosie gestem het, blyk dit dat die uitrol van die busdiens na die Wilderness-omgewing en Heroldsbaai wel in die kaarte is, maar vir later.
Waboomskraal, Geelhoutboom, Hoogekraal en
Uniondale was nie deel van die aanvanklike beplanning nie.
Alvorens die diens na Wilderness en Heroldsbaai uitbrei, moet fase 4 eers geskied - die uitrol van die busdiens na Thembalethu, Lawaaikamp, Borcherds, Conville en Parkdene.
Mense betaal al vanaf Herold na George R400 net om inkopies te doen.
"Sodra daardie fase stabiel is, sal die laaste twee fases (na die Wilderness-omgewing en Heroldsbaai) ook in volgorde uitgerol word. Daar is nie tans enige bevestigde implementeringsdatum vir die uitrol na Thembalethu nie," het GO GEORGE-bestuurder, James Robb, gesê.
Munisipale woordvoerder, Chantel Edwards-Klose, het bevestig dat 'n terugvoersessie oor die GIPTN later vandeesmaand met die raad en ander rolspelers gehou word.