Enkellopendes kuier en leer gesellig saam
'n Besprekingsgroep vir enkellopendes wat 'n paar maande gelede onder leiding van pastoor Lourens Diedericks, uitvoerende beampte van Shepherd's Flock Ministries (SFM), op die been gebring is bied 'n geleentheid vir sosialisering en ondersteuning.
Die groep kom Donderdagaande by Blues Caffè in Redefine Boulevard bymekaar.
By dié gesellige samekomste is daar geleentheid vir groei en leer deur middel van kursusmodules wat Diedericks aanbied. Vier persone het verlede week sertifikate ontvang ná suksesvolle afhandeling van die module, 'My geestelike huis van verhoudings'.
Diedericks sê die module rus mense toe om hul persoonlike verhoudings beter te hanteer, en ook berading en ondersteuning aan ander enkellopendes te bied.
Hy gaan op Saterdag 7 Oktober en Saterdag 14 Oktober seminare aanbied oor die onderwerp, 'Profetiese lering oor my geestelike huis van verhoudings'. Dit is daarop gemik om mense se verhoudingslewe positief te verander. Die seminare sal van 15:00 tot 18:00 by die Blues Caffè plaasvind. Besprekings is noodsaaklik aangesien slegs 20 persone per seminaar toegelaat word.
Belangstellende enkellopendes wat die sosiale groep wil bywoon, kan ook vir Diedericks kontak by 082 730 4956. Die groep beplan sosiale uitstappies oor die komende paar maande voor Kersfees.
"Ons is baie dank aan Gerard Naus verskuldig, eienaar van die Blues Caffè, wat sy plek vir ons beskikbaar gestel het vir byeenkomste op Donderdagaande," sê Diedericks.
SFM is 'n interkerklike geloofsorganisasie.