Frances wil hoop bring met skryfwerk
Die Pacaltsdorpse onderwyser, Frances Frans, wat besig is om as 'n skrywer te ontpop, het Saterdag haar eerste drie boeke bekend gestel.
Frans se boeke is die resultaat van
'n lewe van uiterste wanhoop, pyn en alkoholverslawing, maar haar situasie het só radikaal verander, dat sy ander nou inspireer. "Dit is die begeerte van my hart dat ek ten minste één persoon se hart sal aanraak met die lees van hierdie boek," skryf sy in die voorwoord van Die vroulike alkoholis - my stryd teen hel, wat vanjaar uitgegee is.
Frans was op die punt om selfmoord te pleeg toe 'n boodskap van biskop Msimbithi Dlomo van Thembalethu op die plaaslike radiostasie, Radio Heartbeat, 'n vonkie van hoop in haar hart aangesteek het.
Dlomo, wat Saterdag een van die sprekers was, se aanmoediging het haar tot ander insigte laat kom en eerder die pen laat opneem.
Frans het die drie boeke binne 'n jaar se tyd geskryf. Sy wil hoop en heling bring met haar skrywery, maar skroom nie om uit te wys dat 'n mens die verantwoordelikheid moet neem om die regte keuses in jou lewe te maak nie.
Frans het Saterdag vertel dat haar ou lewe een was van emosionele en finansiële mishandeling, erge
Verslawing kán oorkom word, maar slegs deur Hom wat vir ons ‘n nuwe identiteit gee.
alkoholverslawing, bankrotskap en 'n familie wat haar "afgeskryf" het. Sy het haar ouers aan die dood afgestaan en 'n ongebore baba verloor wat byna ook haar eie dood veroorsaak het. Die man met wie sy nege maande getroud was, is langs haar vermoor.
Sy wil deur te praat en skryf oor haar donker verlede, ander help om uit húlle "tronk" te ontsnap.
"Verslawing kán oorkom word, maar slegs deur Hom wat vir ons 'n nuwe identiteit gee."
Haar eerste boek, Ek moet praat (2016), is geskryf met diep empatie vir vroue wat die bitter, donker kant van die lewe ervaar het.
In Die vroulike alkoholis - my stryd teen hel, wat vanjaar gepubliseer is, vertel Frans haar lewensverhaal en wat tot haar verslawing gelei het, en dan gee sy raad oor hoe om te ontsnap. Haar derde boek, Skeidsmure tussen my en God is in die vorm van dagstukkies waarin sy reguit met gelowiges praat oor hul lewenstyl en hoe dit vergelyk met die Bybel se voorskrifte.
Die bekendstelling is bygewoon deur familielede, vriende en kollegas van Frans wat haar in donker tye ondersteun het.
Epac, 'n talentvolle drama- en dansgroep wat die skrywer op die been gebring het, het 'n kort toneelstuk opgevoer en dansroetine gedoen. Daar was ook 'n uitstalling van Ninette Gordon, 'n familielid van Frans, se skilderye.
Frans se kollega, Claudio Damons, het vir haar gesing, pastoor Jannie Horne en biskop Dlomo het elk 'n boodskap gebring en 'n vriendin Elsabé Myners, het as seremoniemeester opgetree.