Jans wil nog steeds ‘n verskil maak
Die skrywer Jans Rautenbach kan onderhoudend oor sy filosofieë, oor godsdiens en die gevare van onbeperkte materialisme gesels.
Sedert my vorige kuiertjie by Jans en sy innemende vrou,
Lizelle - die liefde van sy lewe - het sy skouerlengte wysgeerlokke plek gemaak vir ‘n vleiende, silwergrys borselkop. Sy intense blou oë vonkel lewenslustig as hy praat oor sy pas voltooide boek Verskeurde Land wat deel is van die sage wat strek oor 120 jaar, en oor generasies van die Scheepers-familie. Die boek raak aan die temas wat na aan sy hart lê - die Afrikaner en die natuur se oorlewing na die vernietigende Anglo-Boereoorlog. Sy eie familie het die hartverskeurende ellendes in die oorlog eerstehands meegemaak.
Driftig
Mees opmerklik is dat hy driftig en onverpoosd praat en byna nie asem skep om oor die SuidAfrikaner se lot onder ‘n korrupte regering, uit te brei nie. Dit (die langasem geselsery) is veral verstommend omdat Jans aan chroniese emfiseem ly en fisies nie meer die indringerbome wat tot teen hulle Denneoord-tuin groei kan gaan afsaag en uitkap soos hy ‘n paar jaar gelede nog gedoen het nie.
Tans hou die onbeheersde verspreiding van indringerbosse ‘n reusegevaar in veral vir Denneoord-inwoners wat reg teen die bosse woon (waarvan die grootste gedeelte munisipale grond is).
“Dit is verstommend dat ons owerhede nie lesse geleer het uit die Knysna se vernietigende brande nie,” sê Jans.
Intussen is daar die opwindende vooruitsig dat een van sy boeke dalk verfilm gaan word en is hy wat Jans is dankbaar vir al die genade van bo.
Nalatenskap
Jans se grootste hartsbegeerte is om ‘n verskil te maak.
Sy vyf boeke, en die prag sekerheidskompleks, Hanja Heath in Port Elizabeth, is deel van sy nalatenskap. Hy sou nog meer wou doen, maar hy kon nie die idee om ‘n rehabilitasiesentrum in ‘n landelike gebied naby George te skep van die grond kry nie (omdat finansiers nie geredelik na vore gekom het nie).
“Maar beslis lewe die droom nog voort en ek doen alles in my vermoë om dit te laat realiseer. Ek sou ook weer graag as ‘n motiveringspreker wou optree - natuurlik gratis - aangesien ek soveel het om voor dankbaar te wees na die liggaamlike terugslae wat die lewe my toegedien het en dan mense met my boodskap van hoop te motiveer.”
Passie
Intussen skryf Jans nog steeds met koorsagtige haas aan sy boeke. Skroeioond, ‘n outobiografie, beskryf hoe hy as plaaskind en seun van hardwerkende sout-vandie-aarde plaasboere ontwikkel het in ‘n sakeman wat ‘n konstruksie en daarna ‘n toermaatskappy bedryf het nadat hy die bande van alkohol- en dwelmverslawing in 2003 afgewerp het.
“Ten spyte van my terugslae het my geloof gegroei tot ‘n magtige wapen en ek ken geen vrees nie. My geloof gee hoop vir ‘n beter toekoms vir my vrou, my mense en my land.
“Ek het God gesmeek om my te spaar net totdat die bom ontplof en God was genadig, want nou is ek hier om Lizelle te beskerm - teen alle verwagtinge in, want volgens die spesialiste moes ek al amper twee jaar gelede gegroet het.”
Jans glo dat as ons almal streef daarna om ‘n verskil te maak, die George-gemeenskap ryklik geseënd sal wees. As almal, insluitende amptenary hul plig nakom, des te beter sal die vooruitgang van die dorp wees.