Modes en bome by 2017 Koekversiergeleentheid
Kinders gaan groot pret hê met die 2017 Koekversiergeleentheid van Hoërskool Outeniqua se Groenportefeulje en Loerie Bakkery wat op Saterdag 14 Oktober in die Crearesaal van Hoërskool Outeniqua gehou word. Agt laerskole en preprimêre skole neem deel aan die geleentheid.
Loerie Bakkery borg die groot koeke asook die versiersuiker waarmee die spanne gaan werk. Die tema vanjaar is, plante en bome van die Suid-Kaap. Die deelnemers versier die koeke en neem dan hul pragtige handewerk terug skool toe om te deel met maats.
Die oggend is ‘n bewusmakingsgeleentheid van Hoërskool Outeniqua se Groen-portefeulje en klein spekboompies wat deur die portefeulje van steggies gemaak is gaan aan die laerskole gegee word om in hul skooltuine te gaan plant.
Een van die hooforganiseerders Elna Pretorius verduidelik, “Spekbome is ‘n wonderlike voorbeeld van ‘n boompie wat met groot sukses koolstofdioksied omsit in suurstof.
‘n Hektaar spekbome kan gemiddeld vier ton CO2 uit die lug verwyder in ‘n jaar en is 10 keer meer suksesvol daarmee as ‘n reënwoud.”
Die oggend sluit ook ‘n vertoning in waartydens van die laerskole hul pragtige werk op die loopplank gaan wys.
Die deure van die Creare-saal open 12:00 en die vertoning begin 12:30. Die koeke kan na afloop van die vertoning besigtig word.
Die publiek is welkom om die vertoning by te woon om 12:30 en daarna na die versierde koeke te kom kyk.
Kaartjies sal vanaf 11:30 slegs by die deur beskikbaar wees. Kaartjies vir volwassenes is R40 en kinders betaal R20.
Die kontakpersoon is Christine Botha by Hoërskool Outeniqua
044 874 4156.
Spekbome is ‘n wonderlike voorbeeld van ‘n boompie wat met groot sukses koolstofdioksied omsit in suurstof.