Outeniqua Klassiek sorg vir spanningsvolle einde
Spanning soos lanklaas langs die rolbalbaan het die baie suksesvolle eerste Outeniqua Klassiek-rolbaltoernooi by die Outeniqua-rolbalklub op 'n hoogtepunt laat eindig.
Die spanne van Billy Radloff van George-rolbalklub en Aubrey Christie van Oudtshoorn-rolbalklub het tot die eindstryd deurgedring en tot die laaste bal gelyk geloop.
Nodeloos om te meld dat die Oudtshoorniete oorstelp van vreugde en baie verlig was toe hulle die titel met 'n enkele punt reg teen die einde van die stryd beklink.
Christie se span, wat ook vir Joos Taljaard van Beaufort-Wes ingesluit het, het soos Radloff se span baie konstante rolbal oor die drie dae gespeel met die Oudtshoornspan wat vanuit die staanspoor die voortou geneem en daaraan vasgeklou het.
Teen die einde het die spanning onder die voorlopers al meer toegeneem en talle belangstellendes het langs die rolbalbaan vasgestaan om die einde van die stryd te aanskou.
Die Kopklappers van Richmond (Kaap) het ook uitstekend gevaar en uiteindelik met die derde plek weggestap.
Lede van die 26 spanne van vier lede wat vanoor 'n wye gebied na George gereis het om deel van die skouspel te wees, was dit eens dat dit 'n baie suksesvolle toernooi was en het te kenne gegee dat hulle aanstaande jaar weer gaan inskryf.
Hierdie eerste klassieke toernooi wat deur die Outeniqua-rolbalklub aangebied is, was 'n droom wat vir klubpresident, Greg Yoing, waar geword het.
Hy was self die hoofborg en het geweldig baie energie ingesit om hierdie dag 'n groot sukses te maak.
Saterdagaand het die spelers en ondersteuners tot laataand fees gevier terwyl Wim Erasmus, Michael Lindt en Herman Grobbelaar die vermaak verskaf het. Elke deelnemer is met 'n heerlike biefstukete vergas.