Garnett Wicomb op pad na Florida
Garnett Wicomb, tennisster van Oudtshoorn, gaan aanstaande week aan die Internasionale Tennisfederasie se Superseniors-Wêreldspankompetisie in Orlando, Florida, in Amerika deelneem.
Die kampioenskappe vind van 8 tot 13 Oktober plaas.
Wicomb (76) sal saam met Giulio Salottolo, George Rough (kaptein) en Willem Lubbe in ‘n span speel. Hulle speel in die 75 tot 80 jaar ouderdomsgroep. Wicomb, lid van die Wesbank-tennisklub, is ‘n steunpilaar in die span, met Rough en Lubbe wat hom nog nie kon wen nie.
Sharon van der Schyff, koördineerder van Tennis Suid-Afrika (TSA), het gesê TSA se deelname aan die wêreldkampioenskappe het ten doel om die beste prestasie te behaal in elke ouderdomskategorie.
“Ek wou nog altyd vir Suid-Afrika speel. Dit was nog altyd my droom om my land oorsee te verteenwoordig. My droom het waar geword,” sê Wicomb in ‘n onderhoud met die Oudtshoorn Courant, die George Herald se susterskoerant.
Wicomb, ‘n vryskutjoernalis en oudredakteur, speel sedert die ouderdom van 16 jaar tennis en was bykans 20 jaar die SWD-kampioen.
TSA voorsien elke speler net van ‘n sweetpak. Alle ander kostes, soos SA kleure, reis en verblyf moet deur Wicomb self gedek word. Enige persoon wat hom wil borg, kan hom skakel by 072 468 6456.