Conville Primêr wen patrolliekompetisie
Vier primêre skole se patrolliespanne is deur die George-verkeersdepartement beoordeel waar hulle hul verbintenis tot die padveiligheid vir hul medeleerders betoon het. Conville Primêr het net-net met die wenbeker in die 2017-patrolliekompetisie weggestap.
Die kompetisie is by die voetoorgang voor Laerskool New Dawn Park in Pacaltsdorp gehou waar die mededingende skole hulle uitstekend van hul taak gekwyt het. Tweede was Dellville Park Primêr met St Mary’s Primêr in derde plake en Laerskool New Dawn Park vierde.
Elke skool het twee spanne ingeskryf.
Die kompetisie het begin met 'n deeglike inspeksie van hul uniforms sowel as 'n fluitjie-inspeksie deur die beoordelaars. In die praktiese gedeelte het die spanne hul doeltreffendheid gewys, verkeer gestop en skoolvriende en die burgemeester van George toegelaat om die pad onder hul wakende oog oor te steek.
Die prysuitdeling is by die verkeersdepartement in Pacaltsdorp gehou.
Die organiseerders van die kompetisie, Rosa Louw van die munisipaliteit en verkeersbeampte Edwin Felix, het die vier skole gelukgewens met die kompetisie en die skoolpatrollies bedank vir die hulp wat hulle daagliks aan die verkeersdepartement gee.
Raadslid Noble het die leerders hartlik bedank.
"Die patrollies speel 'n belangrike rol in die opvoeding van voetgangers en padgebruikers en ons bedank hulle vir die dienste wat hulle lewer in alle weersomstandighede."
'n Onsmaaklike insident het hom kort voor die kompetisie afgespeel toe 'n onderwyser een van die raadslede versoek het om sy DA-baadjie, uit te trek.
Gammat Turner, onderwyser en koördineerder van Conville Primêr, die uiteindelike wenners, het beswaar gemaak teen Cecil Noble, portefeuljeraadslid: beskermingsdienste, se dra van die blou baadjie.
Turner het die burgemeester, Melvin
Naik genader en gesê: "Hierdie is 'n raadsgebeurtenis en nie 'n politieke gebeurtenis nie en ek maak sterk beswaar teen die raadslid wat 'n baadjie met 'n politieke embleem dra."
Turner het gedreig om die skool van die geleentheid te onttrek, waarna Noble sy baadjie uitgetrek het.