Onnie terug by skool na rassisme voorval
I s dit ‘n geknoei om iemand tot ‘n hoër pos te bevorder ten spyte van ‘n rassistiese opmerking, of net ‘n geval van kollegas wat mekaar wil beskerm en ‘n geleentheid gun - dit is wat die Red Pacaltsdorp Hoërskool-groep (RPH) graag wil uitvind.
Die groep se ongelukkigheid kom na die nuus dat Gaye Raubenheimer, ‘n onderwyser van die skool, bevorder is tot onderhoof en sal vanaf 1 Julie haar nuwe pos beklee. Dit terwyl sy verlede jaar deur die Wes-Kaapse departement van onderwys (WKOD) skuldig bevind is op klagtes van rassisme na sy glo die k-woord gebruik het. Raubenheimer wat sover ‘n goeie reputasie in haar loopbaan gehad het, het toe die teiken van ouers en gemeenskapslede geraak, nie oor wie sy is nie sê die besorgdes, maar wel wat sy kwytgeraak het.
Die groep het George Herald genader oor hul ontsteltenis oor haar bevordering.
Die skool se beheerliggaamvoorsitter, Veronique Zana, sê hulle het vroeg verlede jaar ‘n aanbeveling gemaak dat Raubenheimer tot onderhoof bevorder word. Zana sê hulle as beheerliggaam is nooit amptelik ingelig wat die klagtes teen Raubenheimer is nie.
RPH sê hulle kan nie verstaan hoekom die beheerliggaam, na hulle van die klagtes uitgevind het of selfs gehoor het, nie aangedring het op ‘n verduideliking nie.
“As lid of voorsitter van ‘n beheerliggaam moet jy weet hoekom ‘n onderwyser tydelik geskors is,” sê hulle.
Zana sê weer hulle het nooit enigiets van die WKOD gekry oor die klagtes of hul aanbeveling nie. “As ons niks amptelik oor die aangeleentheid hoor nie, kan ons nie daarop optree nie.”
‘n Voormalige lid van die SBL sê hulle was wel bewus van die klagtes, en kon steeds die aanbeveling terugtrek. “Dit was algemene kennis wat die stand van sake was, en hulle kon steeds die departement genader het om die aanbeveling terug te trek of selfs die proses gestop het.”
RPH meen hulle het wel tyd gehad met die onderhoude in November, om hul aanbeveling aan die WKOD terug te trek. Hulle sê die voorval is verlede jaar onder hul aandag gebring na Raubenheimer na bewering die k-woord aan ‘n groep swart leerders gesê het.
Een leerder het baie sterk daaroor gevoel en sy ouers van die voorval ingelig. Hulle het hom aangemoedig om voort te gaan met die saak. Die res van die leerders het volgens RPH ook sterk daaroor gevoel, maar wou nie teikens by die skool van hulself maak nie.
Kenneth Africa, ‘n lid van RPH sê hy het persoonlik met die seun en van die ander leerders gesels, en hy moes eenvoudig optree. “Ons wil vra dat Raubenheimer laat gaan word. Ons wil nie sulke mense, wat sulke goed kwytraak, by ons skool hê nie.”
George Herald het die distrik se kringbestuurder genader vir kommentaar rakende die aangeleentheid, na Raubenheimer hom ingelig het dat die koerant haar genader het om haar kant te stel. Na vele e-posse en telefoonoproepe het die kringbestuurder gister teen druktyd, nog nie reageer nie. Millicent Merton, woordvoerder van die WKOD, het by navraag bevestig dat Raubenheimer vir twee maande geskors was. Raubenheimer het vandeesweek weer begin werk.
Ons wil nie sulke mense, wat sulke goed kwytraak, by ons skool hê nie.”