George se stedelike riviere stagneer
Pauline Lourens
Die Katrivier, geleë in die Katriviernatuurreservaat, was eens 'n borrelende kristalhelder bergstroom waarop inwoners 23 jaar gelede nog met trots na gekyk het. Maar deesdae is dié stedelike riviertjie 'n groot bron van kommer.
Fernridge-inwoners Basie en Rosa du Preez, voel bitter ongelukkig oor die reuk en die algehele voorkoms van die rivier.
"Dit lyk nie na 'n gesonde, lewendige rivier nie. Om die stilstaande water te aanskou en te sien hoe die sakkrappers inwoners se vullis in die stroom gooi, is 'n bitter pil om te sluk."
Die Georgemunisipaliteit se noordoostelike hoofrioolpyp kruis die Katrivier en by tye wanneer dit verstop, loop dit direk in die rivier.
"Die stagnasie wat ons hier sien is nie net 'n stilstaande rivier nie, daar is boonop 'n ongesonde en oormatige besoedeling van ons waterbronne. Telkens as die munisipale werkers besig is om verstopte pype oop te grawe sien ons dat die ou keramiekpype steeds in gebruik is. "Die ou dun pypies kan kwalik met 'n groeiende bevolking tred hou," sê Du Preez.
"Die geringste ding lei tot 'n verstopping. Ons vrees dus die ergste wat waterbesoedeling betref. Hier is ook boomwortels wat die verstoppings vererger."
Indringerbome
Die Du Preezs, wat al meer as twee dekades in George woon, voer aan dat die rivierloop in geen jare skoongemaak is van indringerplante nie. "Destyds toe Kader Asmal nog minister van bosbou was, het ons telkens gehoor dat indringerbome in rivierlope uitgeroei moet word aangesien hulle duisende liters water gebruik. Maar helaas word niks gedoen om die wattel en bloekombome uit te roei en te sorg dat die water vanuit die berg die Tuinroetedam haal nie."
Indringerbestuursplan
Die George-munisipaliteit is pertinent gevra of hulle 'n plan ingedien het met betrekking tot die bestuur van indringerplante ingevolge die wet.
Die munisipaliteit, net soos alle ander grondbesitters, is verplig om so 'n plan in te dien en ook aan te dui wanneer dit in werking gestel sal word. Volgens George se direkteur van siviel-tegniese dienste, Reggie Wesso moet die onkruidstrategie (weed strategy) nog opgedateer word in lyn met wetgewing. "Ons hou die departement van omgewingsake op datum met ons vordering."
Geld 'n probleem
Wesso het in sy 12 April e-pos gesê 'n dringende behoefte bestaan vir geld om indringerbosse uit te roei en daar word met relevante regeringsdepartement en organisasies gekommunikeer om te voldoen aan die
Nemba wetgewing. "Dit is arbeidsintensief en gevolglik 'n baie duur oefening. Indringerbosse hou veral 'n wesenlike gevaar in vir Denneoordinwoners wat 'n paar meter vanaf die bosse woon waar bloekombome reg teen houthuise leun.
Inspeksie
Verlede jaar het Tinus Nortje van AfriForum die probleme met die twee stadsriviere (Kat/ Mitchellriviere) uitgewys aan rdll. Gerrit Pretorius en Marlene Viljoen sowel as aan amptenary van die George-munisipaliteit. Tydens die inspeksie wat Denneoord se 11de Laan ingesluit het, is indringerbome en plante besigtig. 'n Berg afgekapte bome, wat net so gelos is op die Mitchellrivier se oewer op die grens van Dawn Whitehead se Denneoord tuin in Madeliefiestraat, dra nou by tot die aansienlike brandgevaar. 'n Kontrakteur wat deur die munisipaliteit aangestel is, is blykbaar hiervoor verantwoordelik.
Pleidooi van inwoner
'n Bekommerde inwoner Barbara Sawers het twee weke gelede in 'n brief aan die koerant gevra: "Wanneer gaan mense leer om nie ons riviere te besoedel nie."
Tydens 'n opruiming het sy het op allerhande voorwerpe afgekom insluitende 'n groot pot, sokkerbal, rioolpyp en 'n swetterjoel plastiek. Sy het ook gekla oor die Mitchellrivier wat totaal toegegroei is en dat die algehele vloei daarvan belemmer word. "In die 16 jaar wat ek hier woon was daar net een groot skoonmaak en dit was na die vloede van 2007." Sy het 'n pleidooi gelewer dat mense trots moet wees op die omgewing en die besoedeling moet stop. "Ons dierelewe ly daaronder, maar mense gee net nie om nie."
Die Kat en Mitchellrivier se lope kom by mekaar in die Denneoord woonbuurt.