Ontwerper vervul matriekdansdrome
Brümilda Swartbooi
Drome word nog waar en harde werk beloon. Dit was die woorde van Aramé van der Vindt, nadat sy as begunstigde vir Austin Lee se matriekafskeidprojek vir Hoërskool Parkdene, The Prom Night Project, gekies is. Lee, die meesterbrein agter The Prom Night Project sê, hy wil graag terug gee aan leerders wat tans in omstandighede is waarin hy homself ook 'n paar jaar gelede bevind het.
Die ander twee leerders is, Duane
Solomons en Nylene Marbles. Die drie leerders sal ten volle uitgerus word deur alma mater, Austin Lee, vir hulle matriekafskeid in September vanjaar. Lee sê hy is tans in die ontwerp proses en sien uit na die finale skeppings.
Van der Vindt, sê sy was in ekstase toe sy die nuus ontvang, want as gevolg van finansies het sy nooit gedink sy sal ooit haar matriekafskeid kan bywoon nie. Sy het albei haar ouers aan die dood afgestaan en woon tans by 'n vriendin van haar ma. Van der Vindt beskryf haarself as passievol en sy is 'n mens se mens. Haar gunsteling vak is Engels en sy is deel van die seunssokkerspan. Ja, die seunssokkerspan. Sy sê sy wil graag volgende jaar media en kommunikasiekunde studeer.
Solomons sê hy was opgewonde toe hy die nuus ontvang. Hy beskryf homself as 'n gemotiveerde leerder wat toegewyd is teenoor sy skoolwerk. Wiskunde en ekonomie is sy gunsteling vakke en hy wil graag volgende jaar rekeningkunde by Noordwes Universiteit studeer. Solomon is ook onder die top-20 op die gr.12-merietelys.
Marbles was afwesig tydens die onderhoud. Volgens Parkdene skoolhoof, Rodney Cupido is Marbles oorspronklik van die Oos-Kaap, en 'n uitblinker op akademiese gebied.
Die leerders is deur 'n seleksie proses op grond van hul huislike omstandighede en akademiese verdienstelikheid deur die skoolbestuur genomineer en gekies. Cupido, sê die skoolbestuur het voorwaar reg gekies. "Al drie leerders is leiers op hulle eie gebied. Hulle omstandighede mag dalk nie bevorderlik wees vir leer nie, maar hulle styg uit bo hulle omstandighede om 'n sukses van hulle loopbaan te maak."
Cupido se boodskap aan ander leerders is om hardwerkendheid toe te pas, "Jy kan uitstyg bo, jou omstandighede hang van jouself af."
Lee moedig ander oudleerders aan om The Prom Night Project te ondersteun. Persone wat alle inligting en die nuutste opdaterings rondom die projek wil volg is welkom om die Facebook-blad The Prom Night Project te besoek.