Geskeduleerde onderbreking ‘n ramp
André Smalberger, George:
Ek voel verplig om iets te sê omtrent die geskeduleerde kragonderbreking op Sondag 29 April.
In Camphersdrift was ek en verskeie bure totaal onbewus van hierdie sinnelose beplanning.
Onderhoud is uiters noodsaaklik, maar om dit te reël op seker die langste naweek van die jaar gaan my verstand te bowe! So baie word gepleit vir meer toerisme en groter spandering in ons dorp en dan word so 'n katastrofe gereël. Wat 'n dilemma vir inwoners wat vriende en familie ontvang het?
Die onderbreking het ook baie langer geduur as wat my meegedeel is na 'n telefoonoproep vroegoggend.
Wie hierdie onderbreking gereël het moet beslis sy kop laat lees.
Die grys in jou skedel is nie daar om jou ore uitmekaar te hou nie! Dit is om te dink!
If I had a restaurant, hotel, guesthouse etc. in the area I would have been furious!
* Die George-munisipaliteit het verlede Donderdag en weer Sondagoggend 'n kennisgewing aan die media uitgestuur om inwoners in te lig oor die kragonderbreking. Heatherlands, Rooirivierrif, SSK (CBD), Dormehlsdrift, King George Park, Heatherpark, George-Suid, Denneoord, Bo-dorp, Tweerivieren, Oostelike uitbreiding, Fernridge, Camphersdrift en Glenbarrie is geaffekteer. Die onderbreking sou van 07:00 tot 14:00 wees met die doel om veranderings aan elektriese hoofleidings te maak, het die kennisgewing gelees. Kragtoevoer na alle gebiede is weer teen 16:30 herstel. Red