Eden-sport kry tjek vir sportontwikkeling
Die Wes-Kaapse departement van kultuursake en sport het op Riversdal ‘n tjek ter waarde van R2 095 000 aan 36 Edensportfederasies oorhandig wat hulle vir administrasie, transformasie, ontwikkeling, kapasiteitsontwikkeling en die aanbied van topbyeenkomste kan aanwend. Anroux Marais, minister van kultuursake en sport, het die tjek oorhandig - die grootste wat Eden nog vir sportontwikkeling gekry het.
Tydens die oorhandingseremonie, wat in vennootskap met die Hessequamunisipaliteit aangebied is, is die Eden-sportraad lof toegeswaai as die bes georganiseerde en operasionele distriksportraad in die Wes-Kaap.
Eden spog met ‘n 98% nakoming van verpligtinge, 100% teenwoordigheid van federasies by die Trilaterale aanbiedings en die tjekoorhandigingseremonie, die toonaangewendste Eden-sportakademie en ‘n goed gestruktureerde en operasionele skoolsportstelsel.
Tydens die geleentheid is Dave van der Walt, uittredende sekretaris van die Edensportraad, ook vereer vir sy lofwaardige bydraes oor jare heen.
In die Wes-Kaap met sy ses distriksportrade word 131 sportfederasies met R5,4 miljoen gefinansier. Daarvan word R260 000 aan transformasieprojekte toegeken en R400 000 begroot om administrateurs en sportpersone van geaffilieerde lede by te staan om aan internasionale byeenkomste te kan deelneem.
Dr. Lyndon Bouah, hoofdirekteur van sport in die Wes-Kaap, het begunstigdes van die toekennings gewaarsku dat die fondse ekonomies gebruik moet word en dat gereelde terugrapportering deel van die ooreenkomste is.