Koelkop Arende klop OP-Olifante met bonuspuntoorwinning
Hugo Redelinghuys
'n Koelkopvertoning, veral in die tweede helfte toe die OP-Olifante met ses punte voorgeloop het, het verseker dat die SWD-Arende sy veldtog in die Supersportuitdaagreeks met 'n puik oorwinning afgeskop het.
Die Arende het die Baaise span verlede Saterdagmiddag op hul tuisveld met 3420 geklop en in die proses 'n bonuspunt ingesamel.
Vir die Arende, wat tot dusver die seisoen net drie opwarmwedstryde kon inpas voor sy ligaverpligtinge verlede week afgeskop het, moet dit 'n groot hupstoot wees vir hul selfvertroue. Daar was juis groot bekommernis onder die afrigtingskorps dat 'n gebrek aan wedstrydfiksheid en blootstelling aan fisieke kontak in 'n wedstrydsituasie dalk sy tol kon eis. Maar, watwou, die Arende het vasgebyt en nie toegelaat dat 'n golf van paniek oor hul spoel nie. Dit voorspel net goed vir die seisoen wat voorlê.
Rynard van As, hoofafrigter, het 'n paar positiewe dinge omtrent dié wedstryd aan die George Herald uitgelig:
Die Arende se skrumwerk was uitstekend en hulle het die OP-Olifante daar goed opgedreun en gereeld op die agtervoet gehad.
Hul taktiese spel was van hoogstaande gehalte met veral Leighton Eksteen, wat die speler van die wedstryd was, en Divan Nel hier voor in die koor.
Die Arende het gewys hulle kan die druk hanteer, veral toe hulle in die tweede helfte agter geloop het en die tuisspan gedreig het om beheer oor te neem.
. Die plaasvervangers het 'n groot impak gemaak toe hulle opgestuur is. Die Arende het 'n klompie nuwe opwindende spelers bygekry wat nog dié seisoen nog vir hul naam kan maak.
Om 'n bonuspunt met 'n wegwedstryd in te samel, is soos manna uit die hemel. Maar daar is ook enkele aspekte van hul spel wat pla:
Die Arende sal meer klinies moet wees by die afbreekpunte.
Hul balbeskerming skiet ook tekort.
Baie meer geduld is nodig op die aanval. Daar lê nog harde werk voor en hulle moenie nou grootkop kry ná die eerste oorwinning van die seisoen nie.
Vrydagaand op Outeniquapark wag die Grens en dis weer 'n ander uitdaging wat wag. "Ons sal moet herfokus en voortbou op ons vertoning teen die Olifante," sê Van As. "Ons kan en sal die Grens beslis nie onderskat nie."