Vermiste man se lyk gevind
Die liggaam van Christo van Aarde (55), die man wat op Maandag 30 April vermis geraak het, is Maandagmiddag 7 Mei, in ‘n beboste area in Vyfdelaan, naby sy huis in Denneoord gevind.
Volgens die Suid-Kaapse polisiewoordvoerder, kapt. Malcolm Pojie, word ‘n geregtelike doodsondersoek gedoen en geen misdaad word in hierdie stadium vermoed nie.
Op die dag van sy verdwyning het Van Aarde sonder sy beursie of selfoon in die berg gaan stap. Hy is daarna nie weer gesien nie.
In ‘n Facebook-plasing deur sy seun, Chris, sê hy dat die familie nog die skok van die voorval verwerk en dat geen begrafnisreëlings nog getref is nie.
Die soektog na die Noorweegse student, Marie Ostbo (21) is intussen afgelas.
Ostbo het op Dinsdag 17 April op Myolistrand verdwyn terwyl sy saam met ‘n buitelandse studente-toergroep in Sedgefield vertoef het.
Sy het volgens die polisie omstreeks 18:00 op die strand gaan stap.
Slegs haar selfoon, hoed en skoene is later op die strand gevind.
Pojie sê hoewel die soektog na Ostbo afgelas is, sal polisielede gereeld die toneel besoek as deel van die opvolgondersoek.
Hy het die publiek gevra om die polisie te kontak met enige inligting wat kan help om die raaisel van die jong student se verdwyning op te los.
Geen misdaad word in hierdie stadium vermoed nie.
IN SHORT
The body of Christo van Aarde (55), the man who went missing on Monday 30 April, was found in a bushy area in Fifth Avenue near his house in Denneoord on Monday 7 May. According to Southern Cape police spokesman, Captain Malcolm Pojie, no foul play is suspected at the moment. The search for the missing Norwegian student, Marie Ostbo (21), has also been called off.