Traumaberading in markplek brei uit in Tuinroete
Met die toevoeging van ‘n span geakkrediteerde traumaberaders het Arbeidsbediening die afgelope tyd sy dienste aan die markplek in die Tuinroete uitgebrei.
"Die Suid-Afrikaanse samelewing is in ‘n fase van sy geskiedenis waar baie mense die slagoffers word van ernstige traumatiese insidente met ingrypende gevolge vir hulle persoonlike welsyn. Die nuusmedia dra weekliks berigte oor kapings, gewapende roof, inbrake, diefstal, ens. Werkgewers en werknemers wat aan die ontvangkant daarvan is, word emosioneel daardeur diep ontwrig," sê Floors Meyer, een van die beraders.
Hy sê op 'n ander vlak dra die sukkelende ekonomie dikwels by tot werkgewers en werknemers se emosionele trauma. "Besighede moet soms die deure sluit, eienaars het slapelose nagte oor ervaring van verlies wat daarmee gepaard gaan. As gevolg van die ekonomiese druk word werknemers dikwels afgedank, afgelê, of herontplooi.
Dit dompel baie werkers dikwels in ‘n bestaanskrisis."
In die lig hiervan het Arbeidsbediening vier van sy medewerkers as traumaberaders opgelei deur middel van 'n kursus van die Traumatic Incident Reduction Association (Tira), aangebied deur Louis Hough. Hough is ‘n internasionaal geakkrediteerde Tira-fasiliteerder. Die beradingstegniek word deur die
VSA se National Registry of Evidence-based Programs and Practices (NREPP) erken as ‘n bewese tegniek waarmee die berader die getraumatiseerde help om die trauma te integreer en sodoende los te kom van die emosionele effek daarvan.
Werkgewers en werknemers wat van hierdie gespesialiseerde diens gebruik wil maak, kan Adrinette Muller by Arbeidsbediening per e-pos kontak by arbeidsbediening. tuinroete@gmail.com. Belangstellendes kan ook vir Floors Meyer bel by 082 684 2735.
Arbeidsbediening se kantoor is in die Albertasentrum, h/v Albert- en Cradockstraat.