Taxi’s op busroetes ‘n tameletjie
Die landswye busstaking betree nou sy vierde week. Die een oomblik lyk dit of die einde in sig is, maar dan verdwyn die oomblik soos mis voor die son. Intussen stap pendelaars douvoordag van hul huise om betyds by die werk te kom want sommige werkgewers se geduld oor die laatkommery raak min en hulle dreig om personeel af te dank.
Ja, dit gebeur wel, liewe lesers. Dankie aan dié ondernemings wat insig het en vir hul werknemers alternatiewe vervoer reël.
Intussen het plaaslike taxi’s ingespring om pendelaars tegemoet te kom. Dinge het goed verloop tot verlede week toe stakende busbestuurders vreedsaam op die plaaslike verkeersafdeling in Pacaltsdorp toegesak het om hul ontevredenheid met die onwettige ryery van taxi’s op die busroetes te lug. Dansend het hulle in die verkeersafdeling gesing en is daar weg nà ‘n vergadering met die verkeershoof en die polisie.
Maandagoggend breek chaos uit in Pacaltsdorp toe die stakende busbestuurders die pad versper om hul ongelukkige stemme harder te laat hoor. Ek en my twee spruite ontvang vroeg ‘n boodskap van ‘n vriendin dat ons moet wikkel en eerder Delvillepark om moet ry anders is dit nag!
Groot opgewondenheid heers in die motor terwyl ons ry en ek uitspring om ‘n foto te neem waar die polisie en verkeersbeamptes met die stakers praat in Kennetjieslaagte - die duik naby Hoërskool Pacaltsdorp - in
Beachweg.
Hoe nou gemaak…?
Eerstens het jy die pendelaars wat dankbaar is vir die taxi’s wat hulle ‘n alternatief bied tydens die staking.
Dan maak die taxi’s lekker ekstra geld met die ekstra roetes waar hulle nou sonder permitte, onwettig, kan ry sonder dat die verkeersowerhede blik of bloos.
Derdens het jy die busbestuurders wie se staking nou heeltemal sonder trefkrag is.
Die verkeersmanne en -vroue sit met hulle hande in die hare, want wat moet die gestrande pendelaars nou doen? Nie alleen sal die manne en vroue in blou die taxibestuurders woedend maak nie, maar die pendelaars sal ook halsstarrig raak as hulle die taxi’s probeer stop!
Dit wil ook voorkom asof niemand aan dié tameletjie wil raak nie, en dis inderdaad ‘n taaierige saak wat morsig kan raak. Maar iets moet gedoen word. Elkeen het sy kant en stel sy saak wat vir ‘n mens verstaanbaar is.
Maar wat gebeur nou as die staking eendag verby is?
Ek is baie bekommerd dat die situasie met die ryery op die roetes verder probleme gaan veroorsaak.
Gaan daar dan teen die taxi’s opgetree word? Gaan die taxi’s ophou ry op die roetes? Hulle is dan nou vir amper ‘n maand toegelaat om dit te doen sonder enige probleme.
Of gaan die wetteloosheid verdra word?