Emile Minnie en kinderkoor hou konsert by NG Moederkerk
Die publiek van George kry op Vrydag 18 Mei geleentheid om 'n besondere gesamentlike produksie deur Emile Minnie en die Suid-Kaap Kinderkoor in die NG Moedergemeentesaal om 19.00 te ervaar.
Emile se ryk stem, fenomenale klavierspel en vrolike persoonlikheid word deur die suiwer koorklanke van die Suid-Kaap Kinderkoor, onder leiding van JanErik Swart, gekombineer om 'n unieke uitvoering te verseker.
Minnie word deur Laurika Rauch beskryf as een van Suid-Afrika se topAfrikaanse liedjieskrywers. Sy het al heelwat van Minnie se liedjies opgeneem, en resensente is dit eens dat Minnie se liedjies absoluut puik is.
Minnie se Nagmusiek-album is genomineer vir 'n Sama vir beste alternatiewe Afrikaanse album. Hy was onder die topdrie in die Huisgenoot Tempo-liedjiekompetisie, hy is genomineer vir 'n Kanna by die KKNK, en hy was 'n finalis in die ATKV Crescendo-kompetisie.
Minne stel nou sy nuwe CD,
15 Onvergeetlike Jare bekend met van sy mooiste en gewildste Afrikaanse liedjies.
Verskeie Emile Minnie treffers, wat Sandkasteel, Vang my, Eva, Wolraad Woltemade en Gee my jou Hand insluit, is deur Jan-Erik Swart vir vierstemmige koor verwerk. Die Suid-Kaap Kinderkoor berei hul tans voor vir hul deelname aan die 10de Wêreldkoorspele, wat later vanjaar in Pretoria aangebied word. Van hul kompetisieliedere sal tydens die konsert aangebied word.
Kaartjies beloop R60 per persoon en
R40 vir skoliere/pensionarisse.
Dit kan by Mimi by 082 585 0632 bespreek word en sal ook by die deur beskikbaar wees. Verversings sal tydens pouse te koop wees.