Eden-sporttoekkennings vanjaar op Oudtshoorn
Die Oudtshoorn-munisipaliteit gaan vanjaar gasheer speel vir die Edensportraad se jaarlikse sporttoekennings vir 2018. Die prysuitdeling is op Vrydagaand 27 Julie op Oudtshoorn.
Die Wes-Kaapse departement van kultuursake en sport (DKES) is saam met die Eden-sportraad die ankervennote vir die geleentheid.
Die amptelike uitnodigingsvorms word op 14 Mei na alle sportfederasies, munisipale sportrade en skole uitgestuur om hulle meer tyd te gee om mense te nomineer.
Heelwat belangstelling is in die verlede ook van die publiek ontvang, maar al hierdie nominasies moet deur een van die genoemde instansies gehanteer word.
Alle rolspelers word dus vriendelik versoek om, sodra hulle die nominasievorms ontvang, dit te voltooi en aan Dirk van der Westhuizen
(DKES), Dave van der Walt (Edensportraad) en Rudi Claassen (voorsitter: reëlingskomitee) terug te stuur. Die sluitingsdatum vir nominasies in altesame 32 kategorieë is 22 Junie.
Alle Eden-sportfederasies word uitgenooi om hul topsportpersone, afrigters en administrateurs te nomineer.
Verlede jaar is nie minder nie as 160 nominasies ontvang.
Alle federasies wat befondsing vanaf die departement van kultuursake en sport ontvang het, moet volgens ooreenkoms mense nomineer.
Die publiek kan ook nomineer, maar alle nominasies moet op die voorgeskrewe nominasievorm gedoen word en deur die relevante Eden-sportfederasie goedgekeur word.
Nominasievorms kan by die sekretaris, Dave van der Walt, by sportcouncil. eden@gmail.com gekry word of op die webuiste www.edensc.co.za.
Slegs sportprestasies tussen 1 September 2017 en 22 Junie 2018 word in ag geneem. Die wenners van die kategorië wat in ooreenstemming is met dié van die WesKaap, word outomaties finaliste vir die Wes-Kaapse sporttoekennings wat later vanjaar sal plaasvind.