Arende vonkel teen
Nou wag warm Boland op Malmesbury
Hugo Redelinghuys
Hugo Redelinghuys
Dis nog gans te vroeg om nou al die vonkelwyn uit te haal, maar twee agtereenvolgende oorwinnings lyk goed op enige rugbyrapport.
Die SWD Arende se Supersport-veldtog is mooi op dreef en die manier waarop hulle die Grens-Bulldogs verlede Vrydagaand op Outeniquapark met 38-20 afgestof het, is verblydend en gee moed vir die seisoen wat voorlê.
Die eerste helfte was nie watwonders nie en die paar fotograwe agter die doodlyn moes mekaar vermaak. Nog tot kort voor rustyd was daar van sprankelende aksie bitter min te sien.
Die Grens het die tuisspan effens in trurat gehou met sy voorhoede wat in die skrums oorheers en talle strafskoppe daar afgedwing het. Die besoekers se agterlyn was ook warm en honger om die smaak uit die Arende se monde te lak. Op die aanval was hulle ook skerper met die Arende wat gesukkel het om af te rond.
Die tuisspan het die bal so hier en daar net vir kort rukkies behou, maar toe sy snellers van dié krummels in die hande kry, het die drieë gevolg.
Die bul-buitesenter, Tyler Fisher, het vlymskerp deurgebreek en die vlugvoetige heelagter, Leighton Eksteen, vir die eerste drie weggestuur. Toe het Janneman Stander gaan druk ná 'n kraglopie deur Marlo Wiech (regtervleuel).
Met rustyd, en die Arende voor met
17-3, het dit aanvanklik gelyk of die tuisspan redelik maklik sou wen, maar die SuperSport-uitdaagreeks is een groot slaggat en geen span kan sommer goedsmoeds afgeskryf word nie.
Ook maar net sowel. Die Grens was deurgaans gevaarlik en het nie geskroom om die Arende met blitsige teenaanvalle te teister nie.
Maar Rynhard van As, hoofafrigter van die Arende, se praatwerk met halftyd en die verandering in die wedstrydplan het die gewenste uitwerking gehad en die tuisspan kon enduit vasbyt vir 'n bonuspuntoorwinning.
In 'n spanpoging was die Arende-kaptein en agtsteman,
Fabian Booysen, en die twee slotte, Wiehan Hay en Ruben Schoeman, die keur onder die voorspelers. Janneman Stander moet nog 'n swak wedstryd speel.
Agterlangs sal dit 'n blerrie sonde wees om spelers uit te sonder.
Maar hou dié klompie dop: Marlou van
Niekerk, Tyler Fisher,
Marlou Weich, Kirsten
Heyns en Leighton Eksteen. Menere. Elkeen.
En dan die skakelpaar: Johan
Steyn (skrumskakel) en Divan Nel (losskakel). Soos vinkel en koljander: vuurwarm.
Dié klomp agterspelers het Vrydagaand, veral in die tweede helfte, uithalerspel gelewer. Fisher het hom byna uit sy broek gespeel
- en hy het 'n drie om dit te bewys (Sien foto op bl. 53).
As dit is wat die Arende vanjaar in gedagte het, gaan die mense Outeniquapark weer hul tuiste op 'n Vrydagaand maak.
Pasop nou net vir Saterdagmiddag se ontmoeting met die BolandKavaliers. Dis op Malmesbury en dis 'n warm plek daai.