Bakkie wat luier gee drie rowers weg
Michelle Pienaar
Drie rowers het hulle Moses teëgekom terwyl hulle gisteroggend (Woensdag 27 Junie) besig was met 'n inbraak by 'n selfoonwinkel in die Spar-kompleks in Wellingtonstraat.
Lede van Denneoord-buurtwag het pas met hul rondes klaargemaak toe hulle omstreeks 03:50 die oggend op die rooftog by die winkel afgekom het.
"Ons lede het op drie mans afgekom wat binne in die winkel besig was om te roof. Ongelukkig het hulle te voet ontsnap, maar ons het op hulle voertuig beslag gelê," het Louis Keyter, die buurtwag se operasionele bestuurder, gesê.
"Daar is vingerafdrukke en baie goeie DNA in die winkel en voertuig gekry." Die polisie was binne twee minute op die toneel en het op die rowers se bakkie beslag gelê.
"Die voertuig het nog buite staan en luier toe ons manne by die winkel stop," het Keyter aan die George Herald vertel. "Dit het hulle aandag getrek. Hulle het die rowers letterlik op heterdaad betrap. Die mans het ongelukkig daarin geslaag om te ontsnap, maar gelukkig het niemand seergekry nie," het hy gesê. Volgens Keyter het die rowers op 'n stadium deur 'n erf in Aspelingstraat gehardloop, en van hul kledingstukke daar agtergelaat.
Die winkeleienaar was nie beskikbaar vir kommentaar nie. Navrae in die verband is na George-polisie gestuur, maar hulle het nieteen druktyd gereageer nie.