Nuwe baadjie vir ongevalle
Salette Cloete
Die George-hospitaal is tans besig met opgradering en herstelwerk wat tot ses maande kan duur, sê dr. Nellis van Zyl Smith, die hoof van die ongevalle-eenheid. Van
Zyl Smith sê die opgradering gaan meestal die ongevalle-eenheid raak. “Die ambulans aflaai-sone is op die oomblik toe, want dit is waar hulle begin het. Dit is geskuif na ‘n ander ingang. Ons sal ook binnekort ons wagarea toemaak en skuif na die dagteater wat baie kleiner is.”
Hy sê die herstelwerk gaan hul diens asook die wagtye beïnvloed en ekstra druk op die personeel sal plaas. Daarom vra die hospitaal dat slegs mense met ernstige noodgevalle soos steek- en skietwonde, hartaanvalle, ernstige kopbeserings, ensovoorts vir die volgende paar maande die ongevalle-eenheid moet besoek. Daar word gevra dat mense met minder ernstige beserings, wonde of pyn soos oorsteek, allergie of maagpyn asook mense met langtermyn probleme soos rugpyn, eerder ‘n kliniek besoek.
Dit word gedoen, sê Van Zyl Smith, juis omdat hulle nie wil hê mense moet die hele dag kom sit en wag vir diens nie, wat kan gebeur. “Onder normale omstandighede is wagtye baie korter, maar omdat ons onder druk gaan wees, kan wagtye vir minder ernstige beserings en siektes tot 10 ure wees.” Hy sê ook mense moet nie kroniese medikasie by die hospitaal kom haal nie, dis waarvoor die kliniek daar is. “Ongevalle het slegs medikasie vir noodgevalle en slegs vir ‘n 24-uur periode.”
Gedurende hierdie tyd sal die hospitaal ook streng gebruik maak van die ongevalle kleursisteem (triage) - groen vir minder ernstige siektes, geel vir nie-lewensgevaarlike beserings of siektes, bruin vir mense met ernstige, maar nie-lewensgevaarlike beserings of siektes sal dringend gesien word en rooi vir lewensgevaarlike siektes waar mense onmiddellik gesien sal word.