Georgiet wen internasionale toekenning
Salette Cloete
Deesdae moet onderwysers, of hul in 'n klaskamer staan of vir die departement werk, ’n passie hê vir wat hy of sy doen. In die geval van Roger Jacobs, hoof van gespesialiseerde leerder en opvoeder ondersteuning vir die
Eden en Sentrale Karoo Onderwysdistrik, loop die passie oor.
Hy, tesame met sy span, doen alles in hul vermoë om leerders met leerhindernisse te help. Dit is hoekom hy vanjaar deur die afdeling van internasionale spesiale onderwys en dienste (Dises) vir die 2018 internasionale toekenning vir spesiale onderwys benoem is.
Jacobs het vroeër die week die e-pos gekry dat hy die internasionale uitstaande leierskaptoekenning gewen het. Die toekenning gaan volgende week gedurende 'n konferensie in Kaapstad aan Jacobs oorhandig word.
Die toekenning sê Jacobs, word toegeken aan leiers in onderwys wat inisiatief neem en innoverend dink. "Ek is verbaas, maar ook lekker verras deur die toekenning. Ek het nie geweet ek is benoem nie. Ek weet daar is gevra ek moet my CV regkry en stuur, maar dit is regtig 'n groot verrassing."
Hy sê in George probeer hulle, al is dit om klein stappe te neem, ouers, leerders en onderwysers help deur dinge soos 'n WhatsApp-groep, deur rekenaarleer, Skype om leerders wat ver is te help, ensovoorts.
Vir hom bewys die toekenning dat hy en sy span hul werk doen, en dat dit raakgesien en waardeer word.