Tweeling vier 80ste verjaarsdag
Die 80 ste verjaarsdag partytjie van Lettie Booyse van George en haar tweelingsus,
Lala Steenkamp van Pretoria was ‘n vrolike geleentheid waar 40 gaste gesellig saam gekuier het. Dit is verlede week aan huis van Booyse se dogter Mariëtte Visser, by wie sy woon, gehou.
Booyse stap nog graag, behoort aan ‘n musiekklub in George en is nog baie gesond. Steenkamp woon ook by een van haar kinders in Pretoria en stap die hele Pretoria vol en ry gereeld taxi om te kom waar sy wil.
Die vrolike luim by die partytjie is aangewakker toe familielede kans gekry het om verskeie liedjies vir die twee susters te sing.
Die twee is op 17 Junie 1938 in Witrivier, Mpumalanga, gebore en het daar grootgeword, matriek geskryf en is daar getroud. Hulle grootwordjare op ‘n groot familieplaas was baie gelukkig. Hulle was een van drie tweelinge en is deel van ‘n gesin van 10 kinders wat gebore is vir Fanie (‘n sendeling) en Magrieta Meyer.
Onder die 40 gaste by die partytjie was die tweeling se broer, Fanie Meyer (72) van Mokopane en hul suster, Magdel Richter (86).
Booyse het vier kinders (Johan, Mariëtte, Stephan en André), agt kleinkinders en vier agterkleinkinders en Steenkamp twee kinders en een kleinkind. Hul susters Liena van den Bergh van Louis Trichardt (87) en Hester Hockley (89) van Pretoria kon weens ongesteldheid nie die partytjie bywoon nie.
Die ander twee tweelinge in die Meyerfamilie was seuns van wie slegs Fanie nog leef.