Kinderdrome en ‘n monster by teater
Kort en kragtig is woorde wat die George-kunsteteater se kinder produksies goed beskryf. The
Dream Box en Even Monsters can be Princesses het verlede naweek gesorg vir 'n heerlike afskop van die Julievakansie.
Hierdie produksies vorm deel van die uitreikprogram, Asijike Arts, 'n inisiatief van die teater, se aanbieding aan plaaslike skole. Volgens die fasiliteerder van Asijike Arts, Carina Beukes, is die produksies geskryf met die doel om 'n liefde vir die teater by klein woelwaters te ontwikkel.
Hulppersoneel van die kunsteteater en plaaslike akteurs word ingespan om die produksies aan skole bekend te stel.
"Ons neem die teater na die kinders (by die skole) en bring die kinders, skool vir skool, na die teater," het Heather Stead, bestuurder van die kunsteteater, gesê.
"Die uitreikprogram se enorme sukses het ons laat besef dis nodig om die produksies ook aan die breër Georgegemeenskap bekend te stel. TheatreRiffic sal voortaan dié produksies in skoolvakansies by die teater aanbied."
In die produksie The Dream Box word die dialoog beperk sodat kinders van enige taal die opvoering kan verstaan en geniet.
Beukes, die regisseur van die produksie, het gesê die fokus is op vyf van die mees vernaamste drome wat jong kinders ervaar.
"Ons het vyf drome gekies en die stuk rondom dit ontwikkel. Kinders droom graag oor goed soos cowboys en Indiane, om 'n hondjie vir hul verjaarsdag te kry en om hope en
hope lekkers te eet."
Die twee verhoog produksies is niks langer as 30 minute elk nie, wat help om die jongelinge se konsentrasie te behou. Die stories is propvol aksie met kreatiewe aanwending van rekwisiete en interaksie tussen die akteurs en die jong gehoor.