Marshall Boesak behaal vierkuns teen Maori’s
André Stander
Evergreens se binnesenter, die 28-jarige Marshall Boesak, was Saterdagmiddag hul beste speler in hul oorwinning van 60-3 oor Maori’s op die Pacaltsdorp-sportterrein.
Evergreens het in winderige omstandighede met aanskoulike hardlooprugby vorendag gekom en weer die spel gelewer wat hulle vanaf 2014 tot 2016 die SWD Premierligarugbykompetisie laat wen het.
Evergreens se agttal het die grondslag vir die oorwinning gelê. Veral in die skrums het hul vir Maori’s harde bene laat kou. Met die baie balbesit het hul tien pragdrieë gedruk.
Die lenige slot en kaptein, Llewellyn Treurnicht, het voorlangs die vonk verskaf. Hy is goed bygestaan deur Anston Barnado (vaskopstut) en lostrio, Buran Parks, Francois Kemp en Gerschwin Muller.
In die middelveld het Boesak met sy dartellopies die besoekers dronk gehardloop. Sy briljante aftrap, aanvoeling vir ‘n gaping en plettervatte het die Maori’s hoofbrekens gegee. Hy het vier pragdrieë gedruk.
Marshall se sentermaat, Divandre
Strydom, en die vleuels Nathan Beuckman en Shaun Booysen, het ook uithalerspel gelewer.
Vir die besoekers het Marshall Frans (heelagter), Elton Tarentaal (buitesenter), Lorenzo Williams (losskakel) en Leroy Wesso (flank) die oog gevang.
Evergreens se ander drieë is gedruk deur Nathan Beukman (regtervleuel, 2) Divandre Strydom (buitesenter), Gerschwin Muller (agtsteman), Bradley Michaels (haker), Shaun Booysen (linkervleuel). Leegan Moos (losskakel) klits vyf doelskoppe oor. Elton Tarental (buitesenter) slaag vir Maori’s met ‘n strafdoel.
Crusaders het op die Rosemoorsportterrein karakter getoon deur ‘n rustyd agterstand van 7-29 uit te wis teen Silver Stars en met 36-29 te wen. Crusaders het met die ses pragdrieë getoon dat hulle oor genoeg skietgoed beskik om die uitspeelrondes te haal. Die wenspan het in die skrums en vaste fasette die oorhand gehad.
Die talentvolle Curtley Scheepers (buitesenter), Damian Cedras (plaasvervanger-skrumskakel), Lyle Delo (loskopstut en kaptein) Arden Wesso (slot), Bongani Ncqolombe (plaasvervanger- flank) en Sheldon Bruiners (flank) het in die tweede helfte van die wedstryd uitstaande spel gelewer.
Curtley Scheepers (buitesenter, 2),
Elroy Havenga (binnesenter), Llyle Delo (loskopstut en kaptein), Ruben Loxson (plaasvervanger-linkervleuel) en Sheldon Bruiners (flank) is oor vir drieë vir die wenspan. Henry Wolhuter klits drie doelskoppe oor.
Silver Stars se drieë is deur Edwill Rouls (vleuel), Godwin Mangenje (flank) Julian Johnson (slot) en Gavin Delport (flank) gedruk. Henwico Stal (binnesenter) slaag met drie doelskoppe en ‘n strafdoel.
‘n Driekuns deur die spoedvraat Justin Bhana (regtervleuel) van Barbarians het Heidelberg op die D’Almeida-sportterrein in Mosselbaai, gekelder.
Die tuisspan het met 30-27 gewen en skuif nou op na die eerste posisie op die punteleer. Macdelin Saayman (losskakel) en Winston Seconds (slot) het die wenspan se ander drieë gedruk. Saayman slaag ook met ‘n strafdoel en Morne Buis (skrumskakel) klits ‘n doelskop oor.
Marquit September (binnesenter), Gurshwin van Rooyen (regtervleuel) en Martin Hartnick (plaasvervanger) is vir Heidelberg oor vir drieë. Pieter van Rensburg Uys (heelagter) slaag met drie doelskoppe en twee strafdoele.
Groot-Brakrivier het op sy tuisveld vir Blanco met 38-20 getroef. Maseleidien Korkee (binnesenter), Henlinn Botha (losskakel, 2) Anvor Ohlson (slot) en Jean Pierre Kock (plaasvervanger-haker) is oor vir drieë vir die wenspan. Botha slaag ook met vier doelskoppe en ‘n strafdoel en Roshwin Abrahams (heelagter) klits ook ‘n doelskop oor.
Die wedstryd wat Saterdagmiddag tussen Progress en Bridgton op die Bridgtonsportterrein sou plaasvind, is uitgestel na Sondag 15 Julie. Die wedstryd sal regstreeks op TV gebeeldsend word.
In die middelveld het Boesak met sy dartellopies die besoekers dronk gehardloop. Sy briljante aftrap, aanvoeling vir ‘n gaping en plettervatte het die Maori’s hoofbrekens gegee.
Shaun Booysen, vleuel, word om sy heupe beetgekry deur ‘n speler van Maori’s. Booysen het ook ‘n drie gedruk in Evergreens se oorwinning met 60-3.