Sonnige Minke
gaan harte en swemtye verower
Al die reëlings is in plek vir die vertrek van Minke Janse van Rensburg (13) en haar ouers Hennie en Alletta wat na Truro
Nova Scotia in Kanada vlieg waar die 9de Downsindroom Wêreldkampioenskappe vir swem plaasvind. Sy is gekies vir die SA span wat gaan deelneem en met haar insluiting is nasionale kleure aan haar toegestaan.
Groot opgewondenheid heers in die Janse van Rensburg-huishouding. Beide ouers het vandeesweek hul dank uitgespreek oor die morele en finansiële ondersteuning vanaf die George-gemeenskap.
Aletta en Hennie is trots en dankbaar.
"Minke is 'n wonderlike dogtertjie wat baie geluk uitstraal en baie liefdevol is. Sy het 'n hart van goud. Ons is baie trots op haar. Terselfdertyd is dit belangrik dat sy 'n inspirasie vir ander gestremdes kan wees. Haar uitsonderlike sterk wilskrag en uithouvermoë toon dat selfs kinders soos sy op alle terreine van die lewe kan uitblink.”
Volgens haar pa het Minke twee jaar gelede eers begin swem. "Sy het baie vinnig gevorder. Minke besef nie hoe hard sy oefen nie; sy oefen omdat dit vir haar lekker is. Sy geniet dit verskriklik baie en daarom verdien haar afrigter erkenning."
Afrigters
Minke oefen vier tot vyf keer ’n week onder die ervare hand van Sybeth Hughes, van Sammy Seal Swimming Academy in George.
"Ons is baie opgewonde oor wat sy kan vermag by die wêreld swem kampioenskappe ," voeg haar pa by, "maar as sy dit geniet is dit al klaar 'n wen". By die Suid-Afrikaanse Sportvereniging vir intellektuele gestremde persone (SASA II) se nasionale kampioenskappe in Maart vanjaar het Minke vier goue en twee silwermedaljes gewen. By haar skool Carpe Diem word daar styf duim vasgehou vir haar.
Strawwe kompetisie
Informeel het Minke al die 25 m-vryslag onder 19 sekondes geswem. "By die SA kampioenskappe het sy baie na aan die wêreldrekord gekom," sê haar pa. In April is die wêreldrekord in die 25-m vryslag deur Lizzie Allen (14) van Brittanje met 0,07 sekondes verbeter by die Europese Down sindroom ope swem kampioenskappe. Haar tyd was 19,36 sekondes, volgens die webtuiste van haar swemklub, Electric Eels. Minke sal in Kanada teen Lizzie deelneem, sê haar pa. Tydens 'n nie-amptelike oefensessie het Minke haar vorige tyd verbeter en dit maak haar pa hoopvol dat sy goed sal presteer. Volgens haar pa het die skool ’n groot behoefte aan ’n binnenshuise swembad waar die ongeveer 500 leerlinge terapie kan ontvang. Die skool het ’n gewone swembad, maar gedurende die wintermaande kan geen terapie in die swembad plaasvind nie en hoop hy dat ’n weldoener die saak
sal ondersteun.
Fondse vir 'n dak
Volgens die onderhoof, Elzeth Grobler, bars die skool van trots. "Minke dien as groot inspirasie vir elke leerder by Carpe Diem met gestremdhede en natuurlik ons mooi dorp George ook. Sy leef die leuse van ons skool ten volle uit, 'Carpe Diem' - want sy gryp elke dag en ons harte en gebede gaan saam met haar as sy eersdaags vertrek. Die swemoefening is ongelooflik terapeuties. “Indien die skool se dak wat gedurende 'n storm skade gekry het - herbou kan word - sal ons weer deurlopend swem en terapie kan gee.
“Enige persone wat graag vir die projek wil bydra kan gerus die skoolhoof, Karools Hauptfleisch kontak by 044 874 4074 of e-pos by carpediemgeorge@gmail.com."