Polisiebeamptes bult hul spiere
Kristy Kolberg
Twee polisiebeamptes van die George, kapt. Natasja Jansen van Vuuren (44) en sers. Renado Cherry (40), is onlangs in die polisie se nasionale liggaamsbouspan opgeneem wat in September aan ‘n nasionale kompetisie in Kempton Park deelneem.
Natasja Jansen van Vuuren
Vir Jansen van Vuuren het haar liggaamsbou-loopbaan vroeg vanjaar begin toe haar instrukteur, Addington Mondo, haar aangemoedig het om aan liggaamsbou deel te neem.
“Ek het ‘n paar kompetisies as toeskouer bygewoon en altyd gedink hoe ongelooflik dit lyk. Ek sou nooit kon dink dat ek ses maande later my eerste kompetisie sou wen nie,” het sy tydens ‘n onderhoud aan die George Herald gesê.
Sedert Januarie bestee Jansen van Vuuren ten minste twee ure per dag, sewe dae ‘n week, in die gimnasium.
In Junie vanjaar het sy aan haar eerste Destiny Physical
Culture Association Events (PCA)-kompetisie in Mosselbaai, deelgeneem. Hier het sy ‘n eerste plek in die Ladies toned bikini-kategorie vir vroue ouer as 35 verower en ‘n vierde plek in die Ladies toned bikinikategorie vir vroue langer as 163 cm. “Ek sou nooit kon droom dat ek in my eerste kompetisie ‘n eerste plek sou kry nie.” Hierdie prestasie het die weg vir haar gebaan. Daarna wen sy ‘n tweede en vierde plek in The Battle of the Titans-kompetisie in Kaapstad op 22 Junie.
Aan die einde van Junie het sy aan die polisie se nasionale liggaamsboukompetisie deelgeneem waar sy die Miss Fitness Modelkategorie gewen het. Dié wen het haar ‘n plek in die polisie se nasionale span verseker. “Dit was vir my ‘n baie groot oomblik om in die nasionale span opgeneem te word. Dit het eers die volgende dag ingesink. Dis ‘n baie groot motivering vir my om aan te gaan. Ek sou nooit kon dink dat ek vir soveel ander vroue ‘n inspirasie sou wees nie. Vrouens hoef nie bultende spiere te hê om aan liggaamsbou deel te neem nie. Daar is verskeie kategorieë en jy besluit hoe ver jy dit wil vat,” het sy gesê.
Renado Cherry
Cherry is reeds drie jaar lank by liggaamsbou betrokke. “Ek het begin omdat ek ‘n passie vir sport het. Ek is raakgesien en ses maande daarna het ek aan my eerste kompetisie deelgeneem,” sê hy. Hy neem elke jaar aan die Destiny PCA-kompetisie deel waar hy tot dusver elke keer ‘n plek op die podium losgeslaan het. Hy het ook aan die onlangse Destiny PCA-kompetisie in Mosselbaai deelgeneem waar hy ‘n tweede plek in die kategorie vir senior mans onder 70 kg gewen het, en ‘n derde plek in die meesters-kategorie.
By die polisie se nasionale liggaamsboukompetisie is hy vyfde geplaas in die afdeling vir senior mans ouer as 40 asook in die kategorie vir senior mans onder
172 cm. “Ek neem deel om myself te geniet. Ek geniet natuurlik ook die verhoog. As ek ‘n plek kry is dit lekker, maar dis nie vir my die belangrikste nie,” sê hy.
Albei hierdie atlete neem eerskomende naweek aan ‘n kompetisie in Knysna deel.