DBV-inspekteur deel lief en leed
Pauline Lourens
Die lewe van 'n dierebeskermingsinspekteur is een van hoogte- en laagtepunte sê Salomé Bruyns. Sy is al 16 jaar by die Tuinroetedierebeskermingsvereniging werksaam en het Saterdag 30 Junie tydens 'n DBV-ontbyt 'n oorsig gegee van hoe omvattend die organisasie se diens is.
In haar eerstejaar van diens het sy byna haar oë uitgehuil oor die aaklige gevalle wat sy moes hanteer. "Dit was omdat ek in myself geglo het en die passie en liefde vir diere so groot was, dat ek deurgedruk het. Ek glo ek is gebore vir die werk. Die onderskraging van die George- en Mosselbaai-gemeenskap is 'n riem onder die hart en die maandelikse bydraes wat die publiek maak help ook om Uniondale en die ander afgeleë gebiede te finansier. Daar word tot kospakkies aan arm plaaswerkers uitgedeel wat nie by 'n winkel kan kom om dierekos te koop nie.
Uitreike
"Tydens die uitreike vind ons dat daar honde en katte is wat nog nooit gebad is en wat wegskram as hulle gedip moet word.
Dan is daar die diere wat daarna uitsien om aandag te kry en die bietjie vertroeteling wat hulle kry gretig aanvaar. Die sterilisasies sowel as nooddienste wat deur plaaslike veeartse gedoen word beloop 'n yslike bedrag. Dit kos al tussen R50 000 en R60 000 alleenlik vir die aankoop van die middels wat gebruik word om diere te behandel - en dit sluit nie eers die sterilisasies in nie. Dikwels is die kliënte so behoeftig dat hul nie eers
R10 kan bydra tot die mediese-onkoste van 'n dier in nood wat soms op 'n noodoperasie uitloop."
Steriliseer dadelik
Die heel eerste wat 'n diereienaar van 'n nuwe troeteldier moet doen, is om die dier te laat steriliseer. Salomé het gewaarsku teen die kortsigtige gedagte wat honde-eienaars dikwels het om hul hond eenmalig te wil laat kleintjies kry.
"Hulle besef nie die nagevolge hiervan nie. Daar is 'n piramide effek - as elkeen van die honde wat uit die eerste werpsel (wat tussen 5 en 10 hondjies kan wees) gebore is, toegelaat word om elkeen op hul beurt weer kleintjies te kry dan vermeerder dit na 'n paar jaar maklik tot 75 000 diere. Daar is dus 'n vermenigvuldigingseffek van diere wat almal gehuisves moet word. Dieselfde geld vir katte." Salomé het ook opbeurende advies gegee aan die groepie vroue wat die ontbyt geniet het. Sy het aangedui dat sy weer so 'n ontbyt sal wil aanbied en gaste genooi om lede van die DBV te word, wat sal help om die bedryfskostes van die organisasie, wat 'n enorme gebied vanaf Uniondale, Kleinkrantz, Mosselbaai en George in sluit, te help dek.