Bokse vol omgee vir slagoffers
Michelle Pienaar
Drie jong vriendinne wou dié Junie-vakansie vir ander spesiaal maak met ‘n inisiatief wat vinnig ‘n hele groepie vriende en familie betrek het.
Keira Taljaard (10) en twee maats van Laerskool George-Suid, Talia van Rensburg (10) en Karma Pienaar (9) het met die hulp van hul gr.4-skoolmaats, huisvriende, familie en plaaslike besighede ‘n uitreikprogram vir slagoffers van huishoudelike geweld begin.
Deur die Care Box-projek, soos dit genoem word, kry elke vrou en kind wat by die Phambiliskuiling in Rosemoor tuisgaan ‘n boksie vol toiletware en ietsie spesiaals soos ‘n geborduurde waslap.
Die kinders is onder meer verras met ‘n serp, handskoene, speelklei, kryte en inkleurblaaie, sowel as ‘n klein swartbordjie met ‘n sponsie en bordkryt en ‘n handgemaakte teddie. Met die oorhandiging van die bokse verlede Vrydag, 29 Junie, het die inwoners, hul kinders en jong besoekers saam liedjies gesing op die maat van kitaarbegeleiding, blokfluite en tamboryne. Vir die jongelinge was die hoogtepunt verseker die saam baljaar in die buitespeelarea en sjokolade muffins wat die kinders self gebak het. Aanvanklik was die idee om hierdie skenking aan Phambili se inwoners tweejaarliks te maak, maar intussen het die gevoel ontwikkel dat elke vrou en kind wat daar tuisgaan ‘n Care Box behoort te ontvang. Die bestuurder van die skuiling, Maryda Squire, is baie opgewonde en dankbaar vir die inisiatief. “Ons kinders hier ken nie regtig die mooi van die lewe nie. Hulle het nog net die lelik gesien. Julle wys vir hulle daar is mooi ook,” het sy gesê.
Skoolhoof Sas du Plessis het die projek verwelkom en die kinders aangemoedig om saam met hul eie klasmaats die inisiatief verder te neem. Gr.4-leerders het die bokse kleurvol versier en dadelik donasies van toiletware en sagte speelgoed begin maak. Besighede wat ruimhartig geskenk het sluit in Protea Hotel King George, George Mediese Sentrum, die tandartspraktyk van Drs. Coetzee, Du Plessis en Putter.
Diegene wat graag tot die projek wil bydra, kontak Sanet Taljaard by 072 300 5832 of sanet.taljaard@ gmail.com.