Drie Kwaggas haal SA senior atletiekspan
Drie Georgiete is in die finale senior span wat Atletiek Suid-Afrika pas aangekondig het en wat Suid-Afrika vanaf 1 tot 5 Augustus by die Afrika-kampioenskappe in Asaba, Nigerië, gaan verteenwoordig.
Twee atlete van Atletiek SWD, Anél Oosthuizen en Meike Strydom, is in die sterk groep ingesluit wat sterre soos Caster Semenya, Akani Simbine, Carina Horn, Wenda Nel en Luvo Manyonga insluit.
Anel, wat verskeie SA staprekords agter haar naam het en Suid-Afrika in 2016 by die Olimpiese Spele verteenwoordig het, gaan aan die 20-km stap deelneem.
Die 17-jarige Meike Strydom, wat vroeër vanjaar vir Suid-Afrika goud gewen het in gewigstoot by die Sentraal Afrika junior en jeugkampioenskappe in Boksburg, het nou die geleentheid om baie ondervinding op senior vlak op te doen.
Dis ‘n pluimpie vir Hoërskool Outeniqua dat drie van die gekose atlete wat SuidAfrika gaan verteenwoordig deur hul leerskool is, naamlik Anel, Meike en JoAné van Dyk, wat vir Atletiek Noordwes deelneem. Meike het die afgelope week haar blydskap te kenne gegee toe sy aan die George Herald gesê het dis 'n eer om op 17-jarige ouderdom in die senior span opgeneem te word. "Ek sal beslis alles insit om na die beste van my vermoë te kompeteer. Ons span se strewe is om vir die derde agtereenvolgende jaar die meeste medaljes by die byeenkoms in te palm. Dit gaan vir my as junior atleet goeie voorbereiding wees vir die wêreldkompetisies in die 2019 en 2020 seisoene."