Minnie se gedigte bring hoop vir depressielyers
Kobus Minnie 'n inwoner van Oudtshoorn wat tans behandeling ontvang vir depressie in die Mediclinic George se neurokliniek, is bly dat twee van sy gedigte opgeneem is in die digbundel SA Digters - Simfonie van die see. Die boek is onlangs bekendgestel in Wordsworth se tak in die Garden Route Mall.
Hy wil graag 'n boodskap van hoop bring aan ander depressielyers en is van plan om 'n ondersteuningsgroep te begin vir mense wat eensaam is en op moedverloor se vlakte is.
Die man, wat al as 'n eiendomsagent en as verpleër in 'n hospitaal gewerk het, is op vroeë-aftrede geplaas nadat hy twee breinbeserings opgedoen het terwyl hy by die departement van korrektiewe dienste (DKD) gewerk het. Hy het 'n breinbesering opgedoen toe 'n gevangene hom aangerand het en dit het sy korttermyngeheue aangetas.
Hy vertel: "Ek skryf al van my skooldae af, maar dit was toe meer net vir myself. Ek het nie gedink dis goed genoeg vir ander nie. Toe het ek net moed bymekaar geskraap en my werke (gedigte, kortverhale, kinderverhale en radiodramas) ingestuur. Sodoende is 'n kinderverhaal van my in Taalgenoot (2000) gepubliseer en 'n Kersspel en Paasspele opgevoer wat ek geskryf het. Buiten die digbundel, SA Digters - Simfonie van die see is twee van my gedigte gekeur vir AVBOB se nuutste digbundel.
"Verder pos ek van my gedigte op Facebook. Ek dig meestal oor hartsake soos die gemoed van 'n depressielyer (ek ly aan chroniese depressie as gevolg van die breinbeserings) om sodoende mense daar buite te bereik wat dieselfde deurgaan as ek. Al my kinderverhale en ander verhale het ook normaalweg 'n lewensles in.
"Die skrywery is beslis terapeuties en is bevoorreg dat ek 'n mediese fonds het daar is soveel mense wat nie kan gaan vir behandeling vir depressie nie."
As daar lesers is wat belangstel in die totstandkoming van 'n ondersteuningsgroep vir depressielyers kan hulle vir Kobus bereik by kobusminnie99@gmail.com.