Man vasgebind, aangehou met speelgoedpistool
Twee mans (18 en 31) is vandeesweek, kort na 'n inbraak en 'n gewapende roof in Wilderness, in George in hegtenis geneem.
Die eerste voorval het by die Fairy Knowehotel plaasgevind.
Die verdagtes het Sondagoggend omstreeks 02:40 na bewering die perseel van die hotel betree en die gebou deur 'n oop nooduitgang binnegegaan. Volgens 'n werknemer van die hotel word die nooduitgang oopgelos sodat die gaste die hotel kan verlaat in geval van nood.
Die sekerheidswag het volgens hom, ook onlangs bedank en was ten tyde van die voorval nog nie vervang nie.
Een van die gaste se motorfiets, 'n fiets, ketel en klanktoerusting is gesteel.
Al dié gesteelde items is intussen gevind en niemand is tydens die voorval beseer nie.
Daarna is die verdagtes na Joplins, 'n restaurant langs die N2 tussen Wilderness en Kleinkrantz, waar hulle 'n werknemer wat bo die restaurant in 'n woonstel bly, met 'n speelgoedpistool gedreig en hom van geld, sy selfoon en klerasie beroof het.
"Dit het soos 'n regte 9 mm-pistool gelyk. Dit was van 'n harde materiaal gemaak, want hulle het my daarmee teen die kop geslaan en ek kon dit voel. Ek is redelik getraumatiseer, maar baie dankbaar dat ek nie seergekry het nie," het hy vandeesweek aan die George Herald gesê.
Die rowers het die slagoffer forseer om die restaurant oop te sluit waar hulle drank gebuit het. Die verdagtes het te voet van die toneel gevlug, maar hulle vryheid was van korte duur.
Kort na die voorval is 'n WhatsAppboodskap deur die Crime Spottersbuurtwaggroep na verskeie ander buurtwaggroepe gestuur.
"Ons het die inligting en foto's van die verdagte versprei om ander buurtwaggroepe bewus te maak en hulle sodoende vas te trek. Dit het gewerk," het Crime Spotters se Francois van der Merwe gesê.
Omstreeks 00:20 Maandagoggend is die 18-jarige verdagte deur lede van die Bergsig-buurtwag in die middedorp gewaar. Hulle het hom vasgetrek en aan die polisie oorhandig.
Die ander verdagte is Dinsdag in hegtenis geneem.
Albei verdagtes sou gister in die Georgelanddroshof verskyn.
Teen druktyd was besonderhede rondom hulle verskyning nog nie bekend nie.
Hulle staar aanklagte van huisroof, huisbraak en diefstal van 'n motorvoertuig in die gesig.